﻿Guyeiti.
61.
Guye loo ɠundiɠii nɔnɔi ʋe. É loozu ga kɔnigiti. Davide ná-guyei. 
Ee, GALA, woilo nà-kpee wooi ma, ɠida nà-maanɛɛnɛ wooi wu! 
Eteai ɠwɛmaʋɛ ɠa gè wooɠulazu ná è ma, zìiɓɔlɔʋɛ. Lɛ ga ze fasa ɠaaɠoozagi ma, nii gè la zooga gè ʋa zeeli ma ɓɔɠɔ ʋɛ! 
Mazɔlɔɔ ɗa ga nɔ̀un dɔɔɠuzuʋɛ, pɛlɛ ɠaaɠoozagi siɠigi ma, sìli nui ɠaazu. 
Nà pɔ gè zei ɗa-zeɠe ʋɛlɛi wu, gè yɛ ná ɠɔ, gè lɔɔɠu è-ɠoʋegiti bu. 
Mazɔlɔɔ GALA, ɗa ɠa è woilosu nà-minazeɠe gooiti ma, è poganii ve zèa, nii è feezu naati zea, niiti ti luazu è ʋa. 
Gá-masagi zii ma voloiti suɠooza, è ta ɓɔ ti ʋa, ná-konagiti suɠooza yeeɠɛɠalaiti pɛ su! 
É yɛ zeini GALA kakala, eyɛsu ɠɔ. Va bu, ɗa-wooɠɛɠiladai ta ɗa-ɠaamai, naati ti ɓaa tɔun maazu. 
Ungo, nà guyei loozu yeenɔpɛ è-laaseigi lɛbi vai zu, gè nà-minazeɠegiti daazeeli folo-o-folo. 
