﻿Guyeiti.
60.
Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Bulɛgi ma ʋuaiti». Zeele wooi. Davide ná-guyei, kalagi wosu da. 
Siɛgi zu é kɔɔi ʋɛɛni la Siili yooi zu nuiti ba, niiti ti Mezopotami, ta Soɓa. Zoaɓe ɠalesuʋɛ ma, é Edɔme nu waapuugɔ maazu felegɔ (12.000) ʋaani Kpolo Ʋɛtugi zu. 
Ee, GALA, è ɠɛlɛa gi ʋa, è gá-ɠɔɔi ɠoloɠologa. È ɗa-yiiɠaawanai ɠula kɛlɛma, niizu, gi ɓɛtɛna ʋolu. 
È eteai ɲiikpiga, è bali ga. Galeɠalezuʋɛti kpɛtɛ, mazɔlɔɔ toɠa ɲiikpisu. 
È ʋoluɠula vaa ɓaa golaiti seiɗa ɗa-nuɓusɛiti ma, è gaazulati dɔɔi loga gi-la. 
È poo gila fea nuiti zea, niiti ti luazu è ʋa, ti ʋa ʋela ti zili nuiti ta-ɠɔɔɠɔi ʋa. 
Gi unmɔɔ ga è-yeezai, gi wooɠaaʋote, naa ɠa a kɛ è nɛɛbɛ nuiti ti unmɔɔ. 
GALA ge ɓɔɛni seizu ɲadegai, é ɠɛ ma: «Pilɛ sɔlɔɔ nui ɠa é ga ze! Nà Sikɛme ɠaaɠwɛ su, gè Sukɔte nɛmɛi ɠaaɠwɛ. 
Galaade ɠa ga nɔ̀nɔ, Manasé ɠa ga nɔ̀nɔ, Efelayime ɠa ga kɔɔɠɔ wɔɔlɔgi ùnba, Zuda ɠa ga nà-masa tukpɔi. 
Moaɓe ɠa ga kokoi, nii gè maagbazu su, nà-saʋala pilisuʋɛ ɠa ga Edɔme yooi. Nà pilɛ sɔlɔɔ kpeei loozu Filisiti nuiti ta-yooi laalɔɠɔma.» 
Ɓɛ ɠa a li ga ze taa wolai zu, nii siɠigi ma? Ɓɛ ɠa a li ga ze Edɔme? 
Ee, GALA, ɗa laade ɓaa, è ɠɛa ɠɛlɛni gi ʋa? Ee, GALA, siɛgi zu gá-ɠɔɔɠɔ nuiti ti ɠɛni ɠulazu la, è la mɔ ɠɛni ʋilɛsu ti ʋolu. 
Ɓɔ gi ʋa gi zili nuiti daalɔɠɔma, mazɔlɔɔ nuɓusɛiti ta-ɓɔbai ɠa nɔ ga wafuun faa. 
Ni GALA ka ade ʋa, ada pilɛ sɔlɔɔ, mazɔlɔɔ tɔ ɠa é ade zili nuiti dɛɛvɛzu. 
