﻿Guyeiti.
59.
Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Mina koloɠolo!» Davide ná-guyei. Siɛgi zu Sayile ná-pɛlɛi maalatini da ga é ʋa paa. 
Nà-GALAGI, ùnmɔɔ, è kùla sìli nuiti zea, bùzeɠe, gàaɠooza naati ba, niiti ti wuzeɠezu dàalɔɠɔma! 
Ùnmɔɔ, è kùla naati zea, niiti ti telebotala vai ɠɛɛzu, kìzo ɲama ʋuu nuiti ma! 
Mazɔlɔɔ ti ʋɛtɛ, ti lɔɔɠuai zɛ̀nvui ɠoloɠolo fai ma, zobobɛ nuiti ta yaavai ɠilizu mà, anɛɛ ni gè la ga tɔ koloɠolo nu, anɛɛ ni gè la koto ɠɛɛni, Ɠɔoɠɔ GALAGI! 
Anɛɛ ni gè la faaɠaaza gola ɠɛɛni, ta ɓizɛzu, ti ɗa ɠɛʋele ɓɛtɛ. Wuzeɠe, ʋa è dàaɠomi, gwɛlɛi wo! 
Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI, ɗɔun wuzeɠe, è zii ɠiligiti sakpe! Mina nu ʋaa nui tɛiti, telebotala nuiti maawɔinɠa! 
Ta ʋaana ʋolu kpɔkɔi, ti ɓozɔ eɠɛ gilɛiti, ti taai maalati. 
Wɛlɛ, poomugi ɠa ti-laaʋɛ, ti-lakɔlɔgiti ta ga boɠa zɔkpɔiti, ta ɠɛɛzu ɓɔɠɔ ma: «Ɓɛ ɠa a woilo ade-woo ma?» 
Kɛlɛ ɗɔun ɗa, Ɠɔoɠɔ GALAGI, ɗa ti ɲɛɛzu, ɗa ɲɛɛɠulazu zii ɠiligiti kpein su. 
Ɗɛi è ga sɛ̀bɛi, è ʋɔ pelei ɠa gè wɛlɛzu ná. Ungo, GALA ka é mà ga siɠigi. 
Nà-wooɠɛɠila ƓALAGI ɠa ʋa pɔ̀. Nà-GALAGI ɠa sìli nuiti kpein dɛɛ ga ze, pilɛgi zɔlɔɔgai na ti ma. 
Mina ti ʋa, nà-nuɓusɛiti ta ʋa yeema naa ma, kɛlɛ è-zɛbɛi ʋɔ, ti ɠɛ ga teʋeteʋe nu, è ti loka, ɗɛi è ga gá-ɠɔɔɠɔ zɛpɛgi, Maliɠii! 
Ti-laawooi kpein ka ga kotoi nɔ. Ti ɠɔ ga tiya ɓɔɠɔi ta-waso balii, ta-yɛɛiti kpein faa zu ta ta-voovooiti kpein. 
Ti-ma zuwu ɠaaleʋe, ɗa-yiiɠulagi zu, ti-ma zuwu ɠaaleʋe, ti mina mɔ ɠɛna! Toɠa ɠwɛɛ naazu ga GALA ka masadai ɠɛɛzu Izilayɛle unda, eyɛsu é zeeli eteai ɓela ga. 
Ta ʋaana ʋolu kpɔkɔi, ti ɓozɔ eɠɛ gilɛiti, ti taai maalati, 
ti ziɛziɛ, ti ɗa ti-laamianigi ɠaiziɛ. Ni ti la sɔlɔɔni, ti yɛ ná eyɛsu geelaalao. 
Nɔ̀un nà, nà è-zɛbɛi maawuye, sobui, gè ɗa-wooɠɛɠiladai maamusɛ. Mazɔlɔɔ ɗa bɛ̀ ga siɠigi, ʋɛ gè lɔɔɠuzu ná kidaaʋili foloi. 
Ee, nà-zobogi, nà guyei loo è-laaseigi lɛbi vai ma, mazɔlɔɔ GALA ka ga nà-siɠigi, nà-GALAGI nii é wooɠɛɠiladai ɠɛai bɛ̀. 
