﻿Guyeiti.
58.
Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Mina koloɠolo!» Davide ná-guyei. 
Gaamazu, wa tukpɔi ɠaaleʋe ga maaɠɛkpɔgi? Wa nuiti tukpɔɠaaleʋezu nɛi ga sɔledai? 
Naa li poun! Wa telebotalai ɠɛɛzu ga kɛɛɠɛɛi! Zooi zu, toomai ɠa wo fazasu ga wo-yeeiti. 
Faa ɲɔu ɠɛ nuiti ta yɛsu ti-lee ɠoozu ti ɠaka, zɛɛ nuiti ta ɓɔɠɔ ɠakasu, é zo ta ɠɛna zɔlɔɔga ti ʋa ɠula ti-lee ɠoozu, 
ma wanai ɠa ti ʋa eɠɛ kaaliiti, ta woiyeɠei laaɠulusu eɠɛ pɛɛɠaalii goizuɓɔlɔai, 
é la woiloga pote nuiti ta-wuye wooi ma, anɛɛ nii gola ɠeleɠelegai. 
GALA, ti-ɲiigaiti galeɠale ti-laaʋɛ! Ɠɔoɠɔ GALAGI, zala yiʋoiti kpalɔɠaeiti gale! 
Niima nuiti ti ɲɛɛlɛ, eɠɛ ziɛiti ti yeizu! É ná-mɛɛinti pili, ti mina faa ʋaa. 
Eɠɛ koe goi é ʋoolozu, a ɠɛna lia luɠɔ, eɠɛ doin saai é ʋa leɠa zɔlɔɔ, ti la ɠaazulaani foloi ma. 
Aisa wa-laaɠoli liɠiiti ti ʋa ɓadi ga dɔɓɔ ɠaingiti ma abui, ti ma lɛnugi, ɓaa abui ti ʋa, GALA ka tɔngɔlɔ fiilɛi zei faa ɲɔu ɠɛ nui wu, é lii la! 
Toɠa ga koozunɛ telebo nui ʋɛ, a faa ɲɔu ɠɛ nuiti kaana ti ɗa zalai zɔlɔɔ. Toɠa ɠɔɠɔiti maagba ti-ma ɲamai zu. 
Nuɓusɛiti ta ɠɛ ma naazu: «Ungo, telebo nui zalai ɠa ná. Ungo, GALA gila kana nii é tukpɔi ɠaaleʋezu eteai zu!» 
