﻿Guyeiti.
57.
Guyei loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Mina koloɠolo!» Davide ná-guyei. Siɛgi zu é ʋelani la, Sayile ɗa kpɛ, é li é lɔɔɠu pugi zu. 
Màawɔinɠa, ee, GALA, màawɔinɠa! Mazɔlɔɔ zɛ̀nvui ɠa lɔɔɠuzu è ʋoluʋɛ, è-ɠoʋegiti ma niinigi ɠa gè lɔɔɠuzu bu, eyɛsu maanɔɠɔiti ti leʋe. 
Nà wooɠulazu GALA ma, nii é Anii-Pɛ-Unda, GALA nii é fai pɛ kɛɛzu bɛ̀, eyɛsu gaaɓela ga pagɔ. 
Toɠa ná-kizogi leʋe mà, é zeɠe geeɠɔlɔgi zu! É zelii lo naati ma, niiti ti kpɔ̀lɔzu. Lo! GALA ka ná-wooɠɛɠiladai ta ná-gaamai leʋe mà. 
Nà zalaiti saama, nà laani nu mii nuiti kakala, ti-ɲiigaiti ta ga kpɛɛin ta mɛɛinti, ti-nɛgi ɠaaliʋɛ eɠɛ boɠa zɔkpɔi. 
Ee, GALA, è wɔɔlɔ ʋelei lɛ geeɠɔlɔgi maazuʋɛ! Ɗa-lɛbiyai volo eteai zu ná pɛ! 
Ti tumɔi laani nà-pelei zu, ti pɛ̀lɛʋɛlɛni, ti zeɠei wɔ tùɠɔ, kɛlɛ tiya ɓɔɠɔi nɔ ɠa ti loai zeɠei naa zu. 
Ladalai ɠa zìimaʋɛ, ee, GALA! Nà guyei loo, gè è maamusɛ. 
Wuzeɠe, zìi, wuzeɠe! À wuzeɠe, nà-kɔnigi ta nà-papai! Nà geelaalaosuʋɛ maaloɠa! 
Nà è maamusɛ ziiti pɛ saama, ee, Màliɠii! Nà guyei loo è ʋɛ zii ɠiligiti saama. 
Mazɔlɔɔ ɗa-nuɓɔɠɔlai wɔɔlɔʋɛ geeɠɔlɔgi ʋa, ɗa-wooɠɛɠiladai ɓudɛʋɛ tonaɓiingiti maazu. 
Ee, GALA, è wɔɔlɔ ʋelei lɛ geeɠɔlɔgi maazuʋɛ! Ɗa-lɛbiyai volo eteai zu ná pɛ! 
