﻿Guyeiti.
55.
Guye loo ɠundiɠii nɔnɔi ʋe. É loozu ga kɔnigiti. Davide ná-kidafaawui. 
Ee, GALA, woilo nà-maanɛɛnɛ wooi ma, mina lɔɔɠu nà-maanɛɛnɛ wooi ʋa! 
Ɠida nà-faiti bu, è gòoɠaaʋote! Mazɔlɔɔ nà kpalagi wosu, gè ɗa kpeei loo. Zìi ɠa kpɔlɔzu, 
sìli nuiti daawooi maaʋele ma, kpɔidai ʋɔ nu ɲɔiti ti bosu. Mazɔlɔɔ ta màanɔɠɔzu, ti ɗa ʋilɛ pòlu ta-yiiɠulagi zu. 
Zìi ɠa ɓalizu kòozu, saai ʋa luabai ɠa lɔɔzu ùnga. 
Dualuagi ta sasuɓalii naati ta kpɔ̀lɔzu, maalua vai màaɓɔlega. 
Gè ɠɛ ma: «Nà pɔ ga gè koʋe sɔlɔɔ, ga poopogi ɠɛʋele, gè ɠoʋe, gè li gè dooɠo bosu ʋagɔ zɔlɔɔ. 
Wɛlɛ, nà ʋela gè li ɠoozama, gè li gè zei teʋebai zu. 
Nà ʋelazu ʋagɔ zɔlɔɔ ga suvilɛ, gè lɔɔɠu fiilɛi ʋa, anɛɛ fiilɛ wolai.» 
Faazupui lɔ ti zaama, Màliɠii, ti laawooi zupu, mazɔlɔɔ nà toomai ta zeeɠaaɠwɛɛi ɠaazu taazuʋɛ, 
ti ziɛzu kpidii ta foloi siɠigiti ga, telebotalai ta faa ɲɔi ɠa taazuʋɛ. 
Faa zuɠoloɠologi nɔ ɠa é ɠɛɛzu siɠigi naa zu, yaavai ta zɛɛi la zeɠezu ta-maaɓɔ bosuʋɛti. 
Mazɔlɔɔ sìli nu laade, é ʋa ɠɛ ɓaaɠulazu mà, nà la va naa wu, wɔ̀inzeɠe nui laade, é ʋa ɠɛ wuzeɠeni dàalɔɠɔma, nà la lɔɔɠu ba. 
Kɛlɛ ɗa ʋe, è ga zunui ga nɔ̀un kɛʋele, bɔ̀ɔlai, nɛ̀ɛɲɔɠɔi! 
Dɛi de ɠɛa ɓɔni dɔɔɠuzu vaiti ma, siɛgi zu de ɠɛni liizu la ʋɔɔma, ada bɛbɛi GALA pɛlɛi wu! 
Saai ɠula ti viliba! Ti ma vului yei gɔvɛalaazu! Mazɔlɔɔ faa ɲɔi ɠa ti-zeizuʋɛ, ta ti-yiimaʋɛ. 
Nɔ̀un nà, nà kpee loozu GALA goizu, Ɠɔoɠɔ GALAGI ɠa kìzo. 
Kpɔkɔ, sobu ta folo gaalɔgai, zìi ɠa ɓɔlɔzu, gè ɗa ɓala, toɠa gòoi mɛni. 
Toɠa ziilɛigi veezu bɛ̀, é zɛ̀nvui unmɔɔ, é kùla kɔɔi ya, nii ti daalɛa bù. Mazɔlɔɔ niiti ti kpɛ̀ɛzu, ti wola mɔinʋɛ. 
GALA ka gòomɛni é ti ɠaayei. Toɠa masadai ɠɛɛzu yeenɔpɛ! Lo! Mazɔlɔɔ ti la valibosu ɲɛgɛlɛin, ti la luazu GALA ba. 
Zunui naa ɠa laalɛɛzu seiɲɔɠɔiti kpein bu, é ná-minazeɠegi ɠaaʋala ba. 
Daaʋɛ ʋagɛ nɔnɔ vukɔi ʋa, kɛlɛ kɔɔi ɠa é ziimaʋɛ, daawooiti nɛɛʋɛ gulɔi ʋa, anɛɛ naa ʋe, ta ga boɠa zɔkpɔiti niiti ti ɠulaai ti-maalaɠagiti su. 
È-maavaiti zɛ Ɠɔoɠɔ GALAGI ya, toɠa è zɛsɛbo, é la telebo nui yɛga ná, é ʋa ɲiikpi, eyɛsu ɠɔ. 
Ee, GALA, ɗa ti yei zeɠezaɠai ɓomaʋɛ, ɲama ʋuu nuiti, yaava nuiti, ti la ti-zii ma voloi ma ɠaaɠwɛsui zɔlɔɔga eteai zu, kɛlɛ nɔ̀un nà, nà ɠalivaazu è ma. 
