﻿Guyeiti.
52.
Guye loo ɠundiɠii nɔnɔi ʋe. Davide ná-kidafaawui. 
Siɛgi zu Edɔme nui Dowɛge liini la, é ɠɛ Sayile ma, Davide liiʋɛ Ayimelɛke ná-pɛlɛi wu. 
Ɗɛi è zuɓaai, leeni vaa zu è wasosu ɗa-zuɲɔi zu? Wɛlɛ, GALA ná-wooɠɛɠiladai ɠa ɠulazu kɛlɛma folo-o-folo. 
Yaavai nɔ ɠa è-nɛgi kpɛtɛzu, kpeka ɠaaligi, ɗa ga yaava nui! 
Faa ɲɔi nɛɛʋɛ è ʋɛ, é leʋe faa ʋagɔi ʋa, zɛɛ vai nɛ è ʋɛ, é leʋe sɔle kpɔɛi ʋa. 
Nu ɠoloɠolo gooiti nɛɛʋɛ è ʋɛ, è-nɛgi yaavaʋɛ! 
Naa ɠa é ba, GALA ka è lokasu eyɛsu ɠɔ. Toɠa è zosu ɗa-zeɠe ɠotai wu, é è lɔɔɠula, é è-ma zapei lɔɔɠula fulu nuiti ta-yooi ɠa. 
Telebo nuiti ta naa ɠa, dualuagi ti zo, ti ɲɛɛɠula è zu, ti ɠɛ ma: 
«Wɛlɛ zunui ʋa, nii é la ɠɛni GALA kɛɛni ga makɛ nui, kɛlɛ é ɓɔɠɔ ɠalivaani ná-naavolo wolai ma, é ɗa ɓaa ɓɔɠɔ maazu ga ná-keleɠele ɲɔi!» 
Nɔ̀un nà, nà GALA ná-pɛlɛi wu eɠɛ wolive wului ma wundui, gè ɓɔɠɔ ɠalivaaʋɛ GALA ná-wooɠɛɠiladai ma eyɛsu ɠɔ. 
Nà è maamusɛ eyɛsu ɠɔ, è-ɠɛɛ vai ʋɔ, nii è kɛai. Nà ɠitosu è-laaseigi ʋa, tɔɔzei è ʋagɛ ɗa-wooɠɛɠila nuiti bɛ. 
