﻿Guyeiti.
51.
Guye loo ɠundiɠii nɔnɔi ʋe. Davide ná-guyei. 
Siɛgi zu GALA goo wo nui Natan liini la Davide ʋɔ bɛ, pilɛgai ma Ɓate-Seɓa ʋolu. 
Ee, GALA, màawɔinɠa ɗa-wooɠɛɠiladai maaʋele ma, ɗa-maawɔinɠaa wolai ʋɔ, nà-tɔ koloɠologiti gaaʋa. 
Gbà ga pagɔ, è kùla nà-faaɠaaza golaiti su, ɲàde, è nà-kotoi zeɠe bà. 
Mazɔlɔɔ gè nà-tɔ koloɠologiti kwɛɛ, nà-kotoi ma ɠisiɛi ɠa kpɔ̀lɔzu yeenɔpɛ. 
Ɗa ɠa gè kotoi ɠɛai è laalɔɠɔma, ɗa ɠila kpe è laalɔɠɔma, nii ɲɔuɗai è ɠaazu, gè naa ɠɛɛni, naa ɠa a kɛ, è ɠɛ ga sɔle nu ɗa-vaawogi zu, zelii mina lo è ma, ɗa ɠɛna tùkpɔɠaaleʋea. 
Wɛlɛ, sɔ̀lɔɔgɛ faaɠaaza golai zu, kaite zɛ̀gɛ dèe ɠoozu, gè ɠɛ ga kotoba nu. 
Kɛlɛ, gaamai é nui yiimaʋɛ, naa ɠa nɛai è ʋɛ, ɠimalai lɛ ga ze zìimaʋɛ, ʋɛ ná lɔɔɠuai. 
Ɲàde ga ɠizɔɔpe tufa ɓifɔgi, nà ɠole naazu, gbà, nà ɠole kobe kolegi ʋa. 
Koozunɛɛi ta ziilɛi fai wo mà, kpùsɛi è suɓɔlɔkpɔlɔni, naa ɠa ɠoozunɛ. 
Ɠaazuzeɠe nà-kotoiti ba, nà-faaɠaaza golaiti gaaʋa. 
Ee, GALA, zii ʋagɔi ɓɛtɛ kòozu, kìgi niinɛ, è sei ʋele ɓɛtɛ sù. 
Mina pìli ya, è ʋa màaɠooza, mina ɗa-Yɛnvu Ɲadegai ɠula zèa. 
Ɗa-ɠizo fai ma ɠoozunɛɛi ve zèa, GALA, è-yiimaɠɛ ɠi pagɔi yeezei bù, é màkɛ. 
Niiti ti ga tɔ koloɠolo nuiti, nà naati kala ga ɗa-ʋeleiti, kotoba nuiti ta ʋa ʋolu è ʋɔ. 
Ee, GALA, nà-kizo GALAGI! Ùnmɔɔ, è kùla ɲama ʋuu vai nii zu, nà guyei loo, gè ɗa-lelebodai ɠula kɛlɛma. 
Màliɠii, dàkɔlɔgiti buzeɠe, dàaʋɛ è maamusɛ. 
Mazɔlɔɔ zalaɠai la ga è yiilɛi gani, ni naa laade, nà la ta ɠula. Gala zalaɠai la ga è yiilɛi gani. 
Zalaɠa ɠila kpegi soloogai GALA ma, naa ɠa é ga ɓɔɠɔmaayei ɠigi, zɔi nimizaai, ziiɓɔlɔ, ee, GALA, è la ɠɛlɛa naa ʋa. 
Ɗa-nuɓɔɠɔlai zu, faa ʋagɔiti kɛ Siyɔn taa wolai ʋɛ, Zeluzalɛme ná-siɠigiti to. 
Naazu, è yiima zalaɠaiti ta ɠula, ta gala zalaɠaiti, nii kpusɛi kpein ge ɠalazu. Naazu, nikɛ zinɛiti ta ɠula ga zalaɠai, ɗa-zalaɠa ɠulazuʋɛ. 
