﻿Guyeiti.
50.
Azafe ná-guyei. GALA, GALA, Ɠɔoɠɔ GALAGI ɠa ɓɔɛzu, é ɗa eteai loli, é zo folo ɠulazu, é li folo liizu. 
É zo Siyɔn, taai naa fizɔgai pagi zu, miná ɠa GALA ge volozu ná, é ɗa ɠula kɛlɛma adaʋɛ pɛ. 
Gá-ƓALAGI ɠa ʋaazu, é la yɛga maaɠɛkpɔgi zu, abui ɠa tuɠɔ, é ɗa galai wo, maaɠooliʋɛ ga tɔngɔlɔ fiilɛi. 
GALA ka geeɠɔlɔgiti tolisu ti maazu ʋelei, ta zooi, ga ti ʋa ná-nuɓusɛiti tukpɔɠaaleʋe. 
«À nà-lada nuiti gaalɛ ba bɛ̀, ti minazeɠe bɛ̀ ga zalaɠai!» 
Geeɠɔlɔgiti ta ná-telebodai lɛ, mazɔlɔɔ GALA ka é ga tukpɔɠaaleʋe nui. 
«Nà-nuɓusɛi woilo, nà ɓɔɛzu è ʋɔ, Izilayɛle, nà zeele wooi wosu è laalɔɠɔma, nɛ̀i gè ga GALA, ɗa-ƓALAGI. 
Ɗa-zalaɠaiti faa laade, gè ʋa ɠɛ zeliiti tosu da è ma, ɗa-ɠala zalaɠaiti ta gàazu yeenɔpɛ. 
Gè la nikɛ zinɛ zeɠezu ɗa-ʋɛlɛi wu, anɛɛ bolia ɗa-logani makɛsuʋɛ. 
Mazɔlɔɔ dɔɓɔ zuaiti kpein ta ga nɔ̀nɔ, ta sua mɔinmɔingiti ti gizeiti ma. 
Gè wɔniiti kpein kwɛɛ, ti gizeiti ma, ta nii kpein é ɲiikpisu dɔɓɔiti su ta ga nɔ̀nɔ. 
Ni pulu ɠɛni ma, gè la ɓena bo è ma, mazɔlɔɔ eteai ɠa ga nɔ̀nɔ, ta nii dɔin é ʋuuni su. 
Nà ɗa nikɛ zinɛi ma zuaiti mi ɓaa? Nà ɗa boli ɲamaiti kpɔle ɓaa? 
Nii ɗa kɛ ga zalaɠai bɛ̀, nɛ̀i gè ga GALA, naa ɠa ga faanɛɛ wuuɠwɛɛgai. È ɗa-minazeɠegiti daazeeli bɛ̀, nɛ̀i gè Anii-Pɛ-Unda. 
Wooɠula mà kidaaʋili foloi, nà è unmɔɔ, ɗa lɛbiyai ve bɛ̀.» 
GALA ge ɠɛ faa ɲɔu ɠɛ nui ma: «Leeni ʋe mu! Ɗa nà-deveiti bosu ɠisu nɔ, nà-minazeɠe gooi ɠɛ è-laaʋɛ, 
ɗɛi è kalagi wɔinzeɠezu, è dàawooiti pilisu ya è ʋoluʋelei! 
Ɗa unma nui ɠaana, ɗa ɠɛɛzu ga naa ná-kpɔba nui, wa ɓɔsu faa ɠilagi ma wa wɛɛnzo nuiti, 
ɗa è-laaʋɛ lɔɔzu faa ɲɔi zu, è-nɛgi ɠa yaavai ɓɛtɛzu. 
Siɛgi zu wo zeizu la wa zɔiti, ɗa vaazu è-ɠɛɛloin ma, ɗa è-leeloin maaɓoozu. 
«Wɛlɛna, naa ɠa è kɛɛni, gè maaɠɛ kpɔ, è ɠisiɛni ga nà ga è ɠɛʋele, kɛlɛ nà zeliiti tosu è ma, gè ti pɛ dɛɛ è ɠaazu. 
À naa ɠaaɠa, wɔi wo yeemazu mà, nɛ̀i gè ga GALA, à dama, gè mina wo ʋali ga, nu nɔpɛ ge la wo unmɔɔga. 
Zɔi a ɠɛ zalaɠa ɠulazu, é kɛ ga faanɛɛ wuuɠwɛɛgai, naama nui ɠa dɛ̀bizu, zɔi é ɠaaɓaazu siɛ ʋelei ma, nà, GALA, nà nà-kizo fai lɛɛ la.» 
