﻿Guyeiti.
49.
Guye loo ɠundiɠii nɔnɔi ʋe. Kolé mavofodaiti ta-wuyei. 
À woilo dɛɛ nii ma, wo kpein nuɓusɛiti, à woilo dɛɛ, nuɓusɛiti wɔi kpein wo zeini eteai zu, 
ɓolomadɔɠɔiti ta nu wolaiti, wo pɛ kpɛtɛ nuiti ta bala nuiti! 
Ɠima ɓɔɛiti ta ɠulazu dàaʋɛ. Nà-kigaiziɛiti daavegɛ ga kisiɛ ʋagɔiti. 
Gòilogɛ ɠima vaalaaliiti ma, nà faalaaliiti poluwosu kɔnigi ɠa. 
Leeni vaa zu nà lua maanɔɠɔ voloiti ba, siɛgi zu sìli nuiti ta-vaaɠaaza golai màaɠoolizu la? 
Ta-zɔlɔɔgi ɠa ti laai da, ti ɗa waso da, ta-naavolo wolai zaama. 
Nu nɔpɛ ge la zooga é ʋa bɔɔla unmɔɔ. Tanɔpɛ ge la zooga é ʋa zɛnvui unmɔɔ salai ve GALA zea. 
Mazɔlɔɔ ti-yɛnvui unmɔɔ salai wola ɓaaʋɛ. Kɛni ti yeema ma ɠisiɛi ma vɔlɔ ɲɛgɛlɛin. 
Ta ɠisiɛzu ga ta yɛ vulua eyɛsu ɠɔ, ti lɔɔɠu saai ʋa? 
Ɗa ɠima nui ɠaazu, é za, titi nui ta ɠimalala nui naati undaa ɠa ʋilisu ɠana nɔ, ti ti-yeaɠɔligiti zɛ taɠiligaani zea. 
Anɛɛ ni ti-laaseigiti pɛɛʋɛ ta-yooiti ba, ta-ɠabaiti ta ɠɛɛzu ga ta-ʋɛlɛ ɠaaɓelagiti, eyɛsu ɠɔ, ti-zeizuʋɛti ti yɛsu ná, yeeɠɛɠalaiti pɛ su. 
Kɛlɛ nui nii unfema wolai bɛ, naa zii zu la ɠooza ɲɛgɛlɛin, kulaʋɛ ga suaiti ti undaaʋilisu. 
Wɛlɛ fai ʋa, seiɗai naati tuɠɔ, niiti ti laazu ti la, ta-litigi zu, naati ta-ʋelela ʋele vai ɠana, niiti ti ɠitosu ta-ɓɔɛzuɠulaiti ba. 
Ta ti laaʋilisu gɔvɛalaazu eɠɛ baala kpulugi, saai lo ti luɠɔ, é li ga tiye. Su la ɠooza telebo nuiti ti ɠɔɠɔlo ti ma, pagi ti ɠɛni su, naa ɲɛɛlɛ, gɔvɛalaazu ɠa ɠɛ ga ti-zeizuʋɛ. 
Kɛlɛ GALA ka zɛ̀nvui unmɔɔ, é kùla gɔvɛalaazu, mazɔlɔɔ toɠa sèɠe. 
Mina yiizoolɛ, siɛgi zu nui ta ɓɛtɛzu la, siɛgi zu ná-pɛlɛ wu zɔɔlai ɠaawɔɔlɔzu la, 
mazɔlɔɔ é la lia ga tanɔpɛ a ɠɛna zaa, sɔlɔɔ ganiiti ti la ʋilɛga polu. 
Toɠa ɓɔɠɔ leve ga undaanɛɛʋɛ ná-eteai zu. Ta maamusɛ tɔɔzei é undaanɛɛi zɔlɔɔni. 
Kɛni é ʋilɛ mɛmɛwolani polu, ti zaai, niiti ti la mɔ wozakalagi ɠa é ʋa volo eyɛsu pɛ. 
Nui nii unfemai bɛ, kɛlɛ ɠi ge la ma, kulaʋɛ ga suaiti ti undaaʋilisu. 
