﻿Guyeiti.
48.
Guyei. Kolé mavofodaiti ta-wuyei. 
Ungo, Ɠɔoɠɔ GALAGI wɔɔlɔʋɛ, toɠa maamusɛi kpein soloogai ma, gá-ƓALAGI ná-taazuʋɛ, ná-gize ɲadegai ma. 
Gize maanɛɛgi, nii é eteai pɛ koozunɛɛzu, Siyɔn gizei, nii é ga GALA seizuʋɛ, masa golai ná-taai! 
GALA ka ɓɔɠɔ lɛɛzu, eɠɛ siɠi gaaɠoozagi, Siyɔn masa pɛlɛi wu. 
Mazɔlɔɔ wɛlɛ, masagiti ti ɓɔɠɔ ɠaani, ti liini ʋɔɔma Siyɔn laalɔɠɔma. 
Ti wɛlɛni, ti laavɔ, ti ɠoozuʋilini ti ʋela. 
Ti zasuɓalini náʋɛ nɔ, eɠɛ taɓai nii a ɗa anzanui zo a ɠɛna doin zɔlɔɔga. 
Eɠɛ folo ɠulazu ʋele viilɛi, é Taalasise ɓato wolaiti koloɠolosu. 
Nii gi mɛnini, gi naa ɠa gá ɓɔɠɔi Ɠɔoɠɔ GALAGI ná-taazuʋɛ, Fai-Pɛ-Maliɠii, gá-ƓALAGI ná-taazuʋɛ, GALA ka sasulɔ eyɛsu ɠɔ. 
Ee, GALA, gá ɠisiɛzu ɗa-wooɠɛɠiladai zu, è zei ʋɛlɛi wu. 
Ee, GALA, è lɔɠɔɠulaa, ɗa-maamusɛi zeelia zou ɓela ga, è-yeezai laavegɛ ga telebodai. 
Koozunɛɛi ɠa Siyɔn gizei ma, Zuda yooi zu laaiti ta ɠoozunɛɛzu, ɗa-lukpɔɠaaleʋe vaiti maaʋele ma. 
À Siyɔn maalati, wo ziɛ koozuʋɛ, wo ná-pɛlɛ ɠaaɠoozagiti gaalu, 
à ná-siɠigiti pɛtɛ, wo wɛlɛ dɔɔɠuzuʋɛ ma ʋɛlɛiti ba, wo ʋa bo yamanii zu nuiti ma, ti ʋaazu. 
Wɛlɛna GALAGI ʋa, nii é ga gá-ƓALAGI eyɛsu ɠɔ. Toɠa ɠɛ ga gá-lotuɠɔi eyɛsu saai. 
