﻿Guyeiti.
46.
Guye loo ɠundiɠii nɔnɔi ʋe. Kolé mavofodaiti ta-wuyei. Too ʋelei ɠaaɓaingai. 
GALA ka ade ʋɛ ga ade-lɔɔɠuzuʋɛ, ta siɠigi é ade ma, kpɔbai é nu yeema yeenɔpɛ kidaaʋili foloi zu. 
Naa ɠa é ba, maaɠili la ade ma, siɛgi zu eteai ɲiikpisu da, gizeiti ti ɓusɛ, ti ʋu kpoloɗɛiti saamaʋɛ, 
siɛgi zu ma ɗɛiti ti zɔngɔzu la, ti ɗa vuɠe, ti ɗa gizeiti ɲiikpi, ti ɗa ti wuzeɠe. 
Ziɛ wolai ɠa ná, nii ma lobaiti ti GALA ná-taai ɠoozunɛɛzu, nii é Anii-Pɛ-Unda, naa zeizu ɲadega wolai zaamaʋɛ. 
GALA ka zeini saama, é la ɲiikpiga eyɛsu pɛ, GALA ka ɓɔsu ba, é lɔɔzei folo lie kulazuʋɛ ma. 
Zii ɠiligiti ta zɔngɔzu, masadaiti ti ɗa ɲiikpi. Kɛlɛ GALA ga ɓɔɛna, eteai ɠa lua. 
Ɠɔoɠɔ GALAGI, Fai-Pɛ-Maliɠii ɠa ade ʋa, Zakɔɓe ná-GALAGI ɠa é ade ʋɛ ga siɠi gaaɠoozagi. 
À ʋa lɛɛ, wo Ɠɔoɠɔ GALAGI ná-kɛɛwotiiti ka, laavɔɔ vaa wolaiti é ti ɠɛai eteai zu! 
Tɔ ɠa é kɔɔi ɓegai eyɛsu é zeeli zou ɓela ga. Toɠa mɛɛin ɠaleɠalezu, é kpɛɛin zuɠaleɠale, é kɔɔɠɔ wotoloiti gala ga abui. 
«À lo! À suɠwɛɛ ga nà ɠa gè ga GALA. Nà zeini ziiti pɛ unda, nà zeini eteai unda.» 
Ɠɔoɠɔ GALAGI, Fai-Pɛ-Maliɠii ɠa ade ʋa. Zakɔɓe ná-GALAGI ɠa é ade ʋɛ ga siɠi gaaɠoozagi. 
