﻿Guyeiti.
45.
Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Bulɛgi ma ʋuaiti». Kolé mavofodaiti ta-ɠidafaawui, ta ta-nɛɛbɛ wuyei. 
Zìi ɠa ɲiikpisu ga woo ʋagɔiti, nà-kɛɛwotiiti ta ga masagi nɔnɔ! Nà pɔ ga nɛ̀gi ɠɛ ga seeli kpaɠai, é sɛʋɛ ɠɛ nui yeezu nii ɠigi ma. 
Nuɓusɛiti kpein saama, è ʋagɛ ti pɛ ba, è ɓɔɛ ʋeleiti pagɛ, GALA ge tuya looʋɛ è ʋɛ eyɛsu ɠɔ. 
Ɗa-woɠa zɔkpɔi ɠili zaama, kɔɔɠɔ nu wolai, ɗa-maayikii ta ɗa-lɛbiyai nii é volozu. 
Ɗa-lɛbiyai zu, zobo sɔlɔɔ! Lo ɗa-ɠɔɔɠɔ wotoloi luɠɔ, è gaamai maalobo, naa ʋɛɛ ɓɔɠɔmaayeii ʋa ta telebodai! È-yeezai ɠa pilɛ sɔlɔɔ, é faa wolaiti dɛɛ ga ɗe! 
Ɗa-mɛɛinti gaazoɓaʋɛ, nuɓusɛiti ta loo bu è ɠakalaʋɛ, ɗa-mɛɛinti ta lɔ masagi zili nuiti ziiti su. 
Ee, GALA, ɗa-masa kpɔkpɔgi ɠa ná yeenɔpɛ, eyɛsu ɠɔ, ɗa-masa tukpɔi ɠa ga telebo tukpɔi. 
Telebodai nɛɛʋɛ è ʋɛ, è faa ɲɔi wɔinzeɠe. Naa ɠa é ba, GALA, ɗa-ƓALAGI gulɔi ziɛni è ma, koozunɛ wulɔi, é yiimazeɠe ga ɗe è ɠɛɠalaiti saama. 
Miilegi, ta kanɛlegi, naa ʋɛɛ alɔwɛgi ʋa ta ɗa-zeɠei makugi nɛɛzu. Ɗa-masa pɛlɛiti buuɓɛtɛʋɛ ga see ɲiigai, miná ɠa ti kɔnigi ɠɛinsu ná, ti ɗa è ɠoozunɛ. 
Wɛlɛ, masa anzanuiti ka ti ga è-ziɛpoluɲɔɠɔiti, masa anzanui ɠa è yeezazuʋɛ, maaɠiliai ga zanugi nii seɠeai Wofiil yooi zu. 
Woilo dòun anzanu, wɛlɛ, è woilo, yeema ɗa-nuɓusɛiti ma, ta è-ɠɛɛ ná-pɛlɛyeɠei. 
Ɗa-ʋadai nɛa masagi ʋɛ, tɔɔzei tɔ ɠa é ga è-maliɠii, nɔkɔ tɔun bu. 
Tiil yooi zu nuiti, nuɓusɛiti ti wola ɓɛtɛai, naati ta ɗa-ɓɔbai ɠaiziɛ, faanɛɛi ʋɔ ta kɛ è ʋɛ. 
Anzanu loin maazogai masagi ʋɛ, toɠa volozu masa pɛlɛi wu, ma zeɠei zuʋuʋɛ ga zanugi. 
Ta liizu la masagi ʋɔ, é seɠe zuʋuai zu. Anzalopo ɓulugi ʋilɛgai polu, ti ʋa ga tiye è ʋɔ. 
Ti lɔ masagi ná-pɛlɛi wu, ga fɛti wuyeiti, koozunɛɛi zaama. 
È-loun zunuiti ta zei, ti ɠɛ ga masagi, è ɠɛɛni potogi zu. Ɗa ti zei ga kundiɠiiti zooi zu ná pɛ. 
Nà è-laaseigi ɠula kɛlɛma, gè bo yeeɠɛɠalai pɛ su nuiti ma, naa ɠa a kɛ, nuɓusɛiti ti è maamusɛ eyɛsu ɠɔ. 
