﻿Guyeiti.
44.
Guye loo ɠundiɠii nɔnɔi ʋe. Kolé mavofodaiti ta-ɠidafaawui. 
Ee, GALA, gi mɛnini ga gi-woiyeɠeiti, gi-mɛmɛwolani ti boni gi ma, kɛɛwotii nii kpein è kɛɛni ta-ziɛgi zu, wɔlɔwɔlɔi ma voloiti su. 
È-yeei ɠa è zii ɠiligiti kpɛɛni la, è gi-mɛmɛwolani seizu ve, è ziiti doɠani, nii a kɛ ti ɠaawɔɔlɔ. 
Mazɔlɔɔ ta-woɠa zɔkpɔi laade, ti ʋa zooi zɔlɔɔ da ga tɔnɔ. Ti-yeelokoi laade, é ʋa ti ɠizo. Kɛlɛ kɛni è-yeezai, è-yeelokoi, è-ɠaazuʋɛ ma wozakalagi, tɔɔzei è ɠɛni ga ti-ʋoluzeigi, ɗa-ƓALA pagɔlai ʋɔ. 
Ee, GALA, ɗa ɠa è ga nà-masagi, devei ve Zakɔɓe ná-kizo fai zu! 
Gá ɠɛna è ʋolu, gá gi zili nuiti toka, è-zaalai zu, gá ɠɔɠɔlo naati ma, niiti ti wuzeɠezu gi laalɔɠɔma. 
Mazɔlɔɔ gè la ɠalivaani nà-mɛɛin ma, nà-boɠa zɔkpɔi laade, é ʋa ɠɛ kìzosu. 
Kɛlɛ ɗa ɠa è gi ɠizosu gi zili nuiti ma, niiti ti gi maayoseɠezu, è unfegi lɔ naati gaazu. 
Gá-ƓALAGI, gá è maamusɛzu folo-o-folo, gá yɛ è-laaseigi lɛbizu eyɛsu ɠɔ. 
Anɛɛ naa ʋe, è gi ʋiliga ya, è unfegi yei ga giye, è la mɔ yɛsu gá-zalaʋusuiti ba kɔɔmaʋɛ. 
Ɗa vaazu bu gi zili nuiti ti gi ɓɛ, gi wɔinzeɠe nuiti ti loo gi ma ga ti-yiimai. 
È gi lɔɔni ti yeezu eɠɛ baalagiti ti liizu ti ʋaazu, ɗa gi vazasu zii ɠiligiti saama. 
È ɗa-nuɓusɛiti pɔdini ga daanɛai, è la tɔnɔ nɔpɛ sɔlɔɔni su. 
È gi ɠɛɛni ga zɔngɔzɛlɛ ba anii, gi-zeiɲɔɠɔiti zea, gi ɠɛa ga gi-maaɠoolii zu nuiti ta-ɲɛɛɠulasu anii, nii ti zɔngɔzu ma. 
È gi ɠɛa ga ɲɛɛɠulasu anii zii ɠiligiti zea, nuiti ta ɠɔmɔɔnizu ga giye zii ɠiligiti saama. 
Nà-ɓaaɠulamai ɠa tùɠɔ yeenɔpɛ, unfegi gàazuʋɛ ɓidia, 
siɛgi zu gè zɔngɔzɛlɛ ba nui wooi mɛnisu da, é ɗa faiti gaaʋala ba, sili nui é ga potokula nui. 
Naa kpein ka zeelizu gi ma, anɛɛ naa ʋe, gi la yeemani è ma, gi la ɗa-minazeɠegi ɠoloɠoloni. 
Gi la ʋoluaveni ɗa gi-yiimaʋɛ, gi-ɠɔɠɔiti ti la maaɠoozani ɗa-ʋelei ʋa, 
anɛɛ naa ʋe, è gi wolowoloni koʋeiti pɛɛzuʋɛ, è gi maaɓɔlega ga kpidi ɓɔii. 
Ni gi yeemani gá-ƓALAGI laaseigi ma, ni gi yeezeini gala kili bɛ, 
GALA ge la ɓena naa ʋoluɠula ɓaa, tɔungi é dɔɔɠuzu vaiti kwɛɛ nu yiimaʋɛ? 
Kɛlɛ è maaʋele ɠa é kɛɛzu, ti gi lɔɔzu la saai zu folo-o-folo, ti ɗa gi leve ga baalagiti, ti liizu ga tiye ti-ʋaazuʋɛ. 
Wuzeɠe! Leeni vaa zu è ɲiizu, Màliɠii? Wuun! Mina gi ʋili ya ɲɛgɛlɛin! 
Leeni vaa zu è ɠaazuʋɛ lɔɔɠuzu? Leeni vaa zu è yeemazu gá-maanɔɠɔi ma, ta gá-wɔinzeɠemai? 
Mazɔlɔɔ gá laani fufiligi zu, ziiɓɔlɔi zu, gi laaʋɛɛʋɛ zooi ma, ungo, pɔlɔi ɓɔɠɔi ma. 
Wuzeɠe! È ɓɔ gi ʋa! Gi unmɔɔ ɗa-wooɠɛɠiladai maaʋele ma! 
