﻿Guyeiti.
42.
Guye loo ɠundiɠii nɔnɔi ʋe. Kolé mavofodaiti ta-ɠidafaawui. 
Ʋelei kpɔɔle wɔin a ɠɛna dopai ma, a ɗa ziɛi ɠaiziɛ la, nii é yeizu, ʋele ɠana zìi è magalasu da, ee, GALA! 
GALA wɔin ɠa zìi ma, eɠɛ kpɔɔle wɔin, zɛnvu su ƓALAGI. Siɛgi ɓɛgele ɠa nà lii la, gè ɠula kɛlɛma, gè lo GALA gaazu ná-pɛlɛi wu? 
Gàazuɗɛiti ti ɠɛa ga kɔ̀nɔgi, folo ʋɛɛ kpidi ʋa, siɛgi zu ti ɠɛɛzu mà la yeenɔpɛ: «Mini ɠa ɗa-ƓALAGI ná?» 
Anɛɛ naa ʋe, nii gè ɠisiɛzu su, zìi ɗa ɓali kòozu: Gè ɠɛni bɛbɛi luɠɔ, gi ɗa li GALA pɛlɛi ʋɔ pelei, koozunɛ wolai zu, ta faanɛɛ wuuɠwɛɛgai, nuɓusɛi kpein bɛ, niiti ti ɠɛni fɛtii zu. 
Leeni vaa zu, zìi, è ɲiikpisu, è ɗa kpalagi wo kòozu? Ɠito GALA ba, mazɔlɔɔ nà maamusɛzu ʋolu dɛ, toɠa ga nà-kizogi ta nà-GALAGI. 
Zìi ɠa ɓalizu nà-faa zu, naa ɠa é ba, nà ɠisiɛzu è zu, Zuludɛn yooi zu, gè su, Ɠɛɛlɛmɔn gizei, ta Miseyaal gizei ʋɔ bɛ. 
Ziɛ zulugi ɠa ɗa taɠili toli, ɗa-ɠɔtuɗɛiti gooiti ma. Ɗa-veinfeingiti ta ɗa-ɗɛ lakpatakpagiti ti yeini nɔ̀un ma. 
Foloi, Ɠɔoɠɔ GALAGI ɠa ná-wooɠɛɠiladai ɠɛɛzu bɛ̀, kpidii, ná-guyei ɠa ɗa ʋilɛ pòlu. Nà nà-maanɛɛnɛ wooi laazeelizu GALAGI ma, nii é ga zɛ̀nvui. 
Nà ɗa ɠɛ GALA ma, nii é ga nà-fasai: «Lee vaa zu è yeemaai mà? Lee vaa zu kɛni gè ziɛ gaazuɠilii zu, sìli nuiti ta-wɔinzeɠemai zu?» 
Wɛlɛ, gè ɠoloɠologa ɲɛgɛlɛin ga ta-ʋoomugiti, siɛgi zu wɔ̀inzeɠe nuiti ti ɓaaɠulazu mà la. Ta ɠɛna ɠɛa mà yeenɔpɛ: «Mini ɠa ɗa-ƓALAGI ná?» 
Leeni vaa zu, zìi, è ɲiikpisu, è ɗa kpalagi wo kòozu? Ɠito GALA ba, mazɔlɔɔ nà maamusɛzu ʋolu dɛ, toɠa ga nà-kizogi, ta nà-GALAGI. 
