﻿Guyeiti.
41.
Guye loo ɠundiɠii nɔnɔi ʋe. Davide ná-guyei. 
Undaanɛ nu ɠa ga naama nui, nii é daazu ma ga bala nui ná-fai! Maanɔɠɔ voloi, Ɠɔoɠɔ GALAGI unmɔɔ tɔ ɓalaa. 
Ɠɔoɠɔ GALAGI ɠa makɛ, é zɛnvui wo, undaa ɠa nɛ ná-zooi zu, é la dɔa sili nuiti ziimai zu. 
Ɠɔoɠɔ GALAGI ɠa yeeyɛ ba, a ɠɛna laani betei zu taɓai ba. Toɠa pilɛ kɔɠɔiti ga, siɛgi zu é zeeɓɛzu la. 
Gè ɠɛni ma: «Ee, Ɠɔoɠɔ GALAGI, màawɔinɠa! Kɛdɛyai ve bɛ̀, gè kotoi ɠɛa è laalɔɠɔma!» 
Wɔ̀inzeɠe nuiti ta ɓɔɛzu dàalɔɠɔma ga ɲɔuɗa, ti ɗa ɠɛ ma: «Siɛgi ɓɛgele zu ɠa é zaazu la? Daaseigi ɠa za siɛgi ɓɛgele zu?» 
Ni nui ta a ʋaana é wɛlɛ bà, toɠa kpɔɛ wafuungiti bosu, zii ɠa telebotala vaiti gaalɛɛzu ba, é ɠula, é li, é ɓɔɛ eteaʋɛ. 
Niiti kpein ti wɔ̀inzeɠezu, ta ɓɔɛzu laa wu ɓɔɠɔ zaama ga ze, ti ɗa ɠisiɛ maanɔɠɔ vaiti su dàalɔɠɔma. 
«Niima zeeɓɛi é sogai, faa ɲɔu wola ɠa! É laa betei ɠa, é la mɔ wuzeɠea eyɛsu pɛ!» 
Anɛɛ bɔ̀ɔla ʋagɔi nii gè laani da, gi ɗa nà-daamianigi mi gá tɔ, naa wuzeɠea dàalɔɠɔma. 
Kɛlɛ ɗɔun ɗa, ee, Ɠɔoɠɔ GALAGI, màawɔinɠa, è ʋa è bùzeɠe, nà naa ve ti ya, nii maanɛai ti sɔlɔɔ. 
Wɛlɛ, nii gè kwɛɛgai la ga è wɔinʋɛ ga ze, toɠa ga sìli nui la zobo sɔlɔɔsu mà. 
Ɗa makɛsu mà nà-sɔbalalai zu, ɗa màkɛ è ɠakalaʋɛ eyɛsu ɠɔ. 
Mamagi ɠa Ɠɔoɠɔ GALAGI ʋɛ, Izilayɛle ná-GALAGI, ɠɔoɠɔ! Amina! Amina! 
