﻿Guyeiti.
40.
Guye loo ɠundiɠii nɔnɔi ʋe. Davide ná-guyei. 
Gè ɠitoni Ɠɔoɠɔ GALAGI ʋa, é ungi maayeini pɔ̀ pelei, é woilo nà-maanɛɛnɛ wooi ma. 
É mɛ̀ɛnni, é kùla zeɠezaɠa ɲɔi zu, palaʋalai ɓomaʋɛ. É kɔ̀ɠɔiti to fasai ma, é kɔ̀ɠɔiti topele ɓɛtɛ. 
É guye niinɛ lɔ dà, da-ƓALAGI maamusɛ vai ma, ma mɔinmɔin ka pɛtɛ, ti lua tɔun ba, ta ɠaliva Ɠɔoɠɔ GALAGI ma. 
Undaanɛ nu ɠa ga naama nui, nii é ɠitosu Ɠɔoɠɔ GALAGI ʋa, é la ɠaaʋotesu waso nuiti ma, niiti ti zɛɛ wo maaɓɔgi zu! 
Ɠɔoɠɔ GALAGI, ná-GALAGI, è ɗa-vaa ʋagɔiti ta è ɠisu vaiti mɔinʋɛ su gi letegi, è-ʋokɔɠɔma la ná, nà pɔ gè naa wo, gè zeze la, ti wola mɔinʋɛ gola, ti ɠaa la luga. 
È la zalaɠai ʋɔ, ɓaa vebɛanii, è gòiyeɠeiti daalaogɛ, è la gala zalaɠai maaɠaazaɠaboni, ɓaa koto gba zalaɠai. 
Gè ɠɛni ma naazu: «Wɛlɛ, gè ʋa ga sɛʋɛi nii kɛai nà-faa zu, 
zìima vai ɠa ga gè è-yiimai ɠɛ, nà-GALAGI! Ɗa-lɔgi ɠa zìimaʋɛ.» 
Nà unmɔɔ fai ma woo niinɛ ʋagɔi laazeelizu maaɓɔ golai zu, wɛlɛ, gè la laaɠulusu, Ɠɔoɠɔ GALAGI, è naa zuɠwɛɛ! 
Gè la unmɔɔ fai zulɔɔɠua zìimaʋɛ, nii è kɛai bɛ̀. Nà zezezu ga ɗa-wooɠɛɠiladai ma vai, ta ɗa-ɠizo fai, gè la ɗa-nuɓɔɠɔlai lɔɔɠua, ta ɗa-ɠaamai maaɓɔ golai zu. 
Ɗa, Ɠɔoɠɔ GALAGI, è la ɠɛlɛa, è ʋa ɓe ɗa-maawɔinɠai veezu bɛ̀. Ɗa-wooɠɛɠiladai ta ɗa-ɠaamai, ta màkɛ eyɛsu ɠɔ. 
Maanɔɠɔ mɔinmɔin ka màaɠoolii zu, nà-faaɠaaza golaiti ti pilɛ sɔlɔɔga mà, gè la zooga gè ʋa wozaɠa. Ti mɔinʋɛ, ti leʋe nɔ̀undeɠai ʋa, sùvikɛi ɠulaa sù. 
Ee, Ɠɔoɠɔ GALAGI, soma è ùnmɔɔ! Ɠɔoɠɔ GALAGI, suvilɛ, è ɓɔ bà! 
Ti pɛ ti unfe ʋɔɔma, ti wooi zupu, tɛiti ti pɔ ti zɛ̀nvui ɠula zèa! Ti li ga ʋoluʋelei, ti unfe, tɛiti kpein ti wɔinɗai ga màanɔɠɔ! 
Ti laavɔ ta-unfegi ma ɠasɔi wu, niiti ti ɲɛɛɠulazu nɔ̀un su! 
Niiti dɔin ti è ɠaiziɛzu, ti ɠaazuɠalakala, ti ɠoozunɛ è ʋɔ, niiti ɗa-ɠizo fai nɛai ti ʋɛ, ti ɠɛ ma yeenɔpɛ: «Lɛbiyai ɠa Ɠɔoɠɔ GALAGI ʋɛ!» 
Nɔ̀un nà, màanɔɠɔʋɛ, gè ɠɛ ga bala nu, kɛlɛ Màliɠii ɠa ɠisiɛzu sù. Ɗa ga nà-kpɔba nui, ta ùnmɔɔ nui, nà-GALAGI, mina nɛkɛ! 
