﻿Guyeiti.
38.
Davide ná-guyei, é ɠɛ ga ɠizɛsui. 
Ee, Ɠɔoɠɔ GALAGI, mina fàla, ɗa-yiiɠaawanai zu, mina dòɠa, ɗa-yiiɠulagi zu. 
Mazɔlɔɔ ɗa-mɛɛinti ti nɔ̀un soga, è-yeei wuiʋɛ mà. 
Fai tanɔpɛ ge la mɔ ɠɛʋele ma kpùsɛi zu, ɗa-yiiɠaawanai maaʋele ma. Kɛdɛya la mà ɠaeiti zea, nà-kotoi maaʋele ma. 
Mazɔlɔɔ nà-faaɠaaza golaiti kpudɛʋɛ nà-kisiɛi maazu, eɠɛ kasɔ wuigi, ti wuiʋɛ mà gola. 
Nà-palaiti ti ɲɔuɗa, ti-ɠugi ɗa ɠula nà-ɠimalalai maaʋele ma. 
Kpìligɛ, gè ɓɔlɔ fɔ da ge leʋe, folo-o-folo, nà ziɛzu ziizoolɛi zu. 
Mazɔlɔɔ abui ɠa é sàamaʋɛti galazu, fai tanɔpɛ ge la mɔ ɠɛʋele ma kpùsɛi zu. 
Zɛbɛ la mɔ bà, sùɠaleɠalea, nà kpalagi wosu, tɔɔzei nà-ziiɓɔlɔi ʋa. 
Màliɠii, wɔ̀inma vaiti kpein ta è ɠakalaʋɛ, kpàla gooiti ti la lɔɔɠuni è ʋa. 
Zìi ɠa doɠazu gola, sɛ̀bɛi ɗa ɠula zèa, gàazuʋɛ la mɔ wozaɠaazu. 
Nà-kpɔlɔi maaʋele ma, bɔ̀ɔlaiti ta sìɛpoluɲɔɠɔiti ti maaɠooza bà, sèiɲɔɠɔiti ɓalaa ti maaɠooza bà. 
Niiti ti pɔ ti pàa, naati ta baliiti tɛɛzu tùɠɔ, niiti ti ɠɛɛzu maanɔɠɔi zeeli mà, naati ta kpɔɛiti bosu, nii a kɛ gè ɠoloɠolo, ti ɗa unsuyelii lo folo-o-folo yaavai zu. 
Nɔ̀un nà, gè ɠɛa eɠɛ goizuɓɔlɔ nui, gè la ta mɛnisu. Nɔ̀un daaɠulugɛ eɠɛ ɓoɓoi. 
Kɛ̀ɛʋɛ eɠɛ zunui nii é la faa mɛnisu, é la ta zuloozu. 
Ɗa ɠa gè è maaɓɔunsu, Ɠɔoɠɔ GALAGI, ɗa ɠa ɗa gooɠaaʋotegi wo, Màliɠii, nà-GALAGI! 
Mazɔlɔɔ nà bosu è ma ga: «Ti mina ɲɛɛɠula nɔ̀un su, ti ʋa wuzeɠe dàalɔɠɔma siɛgi zu kɔ̀ɠɔi ɓalizu la!» 
Mazɔlɔɔ sàsu ɠa na ʋa ɓalizu, taɓai ɠa kɔ̀lɔ su yeenɔpɛ. 
Ungo, gè nà-faaɠaaza golai ɠwɛɛ, zìi ɠa zoolɛzu ga nà-kotoi vaa. 
Tama sìli nuiti ta vulua, zɛbɛi ɠa ti ʋa. Niiti ti wɔ̀inzeɠezu fuun, naati mɔinʋɛ. 
Niiti ti nà-faanɛɛi zuloozu ga faa ɲɔi, ti ɗa wuzeɠe dàalɔɠɔma, tɔɔzei faa ʋagɔi ɠa gè gaiziɛzu. 
Ee, Ɠɔoɠɔ GALAGI, mina ɠɛlɛ bà. Nà-GALAGI, mina maaɠooza bà. 
Ʋa fala, è ɓɔ bà, Màliɠii, nà-kizogi! 
