﻿Guyeiti.
36.
Guye loo ɠundiɠii nɔnɔi ʋe. Ɠɔoɠɔ GALAGI ná-botiɠɛ nui Davide ná-guyei. 
Nà ɗa ɠisiɛ zìimaʋɛ naa zu, nii faa ɲɔu ɠɛ nui bosu ná-tɔ koloɠologi zu, GALA gaazuluabai la gaazu ga faa nɔpɛ. 
Mazɔlɔɔ daaʋɛ ɓɔɠɔ la gola ná-sɔle fai zu, é la zooga é ʋa ná-faaɠaaza golai ɠwɛɛ, é ʋa wɔinzeɠe. 
Kpɔɛi niiti ti ɠulazu daaʋɛ, ta ga zɛɛi ta yaavai nɔ. Toɠa ɠɛlɛzu faa yɔɠɔzuɠaa vai ʋa ta faa ʋagɔi. 
Toɠa ɗa ɠisiɛ yaavai zu, a ɠɛna laani ná-betei zu, toɠa ziɛzu pelei zu nii é la ʋani, é la faa ɲɔi ʋilisu ya. 
Ɠɔoɠɔ GALAGI, ɗa-nuɓɔɠɔlai wɔɔlɔʋɛ geeɠɔlɔgi ʋa, ɗa-wooɠɛɠiladai zeeli tonaɓiingiti ma. 
Ɗa-lelebodai ɠaaɠoozaʋɛ, eɠɛʋelei gize ɠaaɠoozagiti ti la, ɗa-leveiti kpoma ɠoozaʋɛ, eɠɛʋelei kpoloɗɛiti buuzeiɗai la, ee, Ɠɔoɠɔ GALAGI, ɗa ɓaazu nuiti maazu ta suaiti. 
Ee, GALA, ɗa-wooɠɛɠiladai wola ʋagɛ! Nuɓusɛiti ta lɔɔɠuzu è-ɠoʋegiti ma niinigi wu. 
Ɗa ɗa-ʋɛlɛi wu vaaɓɔɠɔi ɠɛɛzu ti ʋɛ, ta sɔlɔɔ é ʋooʋa ti ma, ti ɓɔɔle ga ɗa-nuɓɔɠɔlai ma ɗɛ wola ʋagɔi. 
Mazɔlɔɔ zɛnvu ɗɛungi ɠa è ɠobaʋɛ nɔ, ɗa-wozakalagi ʋɔ, gá wozakalagi ɠaazu. 
Ɗa-wooɠɛɠiladai makɛ è ɠwɛɛ nuiti bɛ, ta ɗa-lelebodai ɓalaa naati bɛ niiti ti-yii zɔlegai! 
Waso nuiti ti mina ɠɔɠɔlo mà, faa ɲɔu ɠɛ nuiti ti mina kpɛ̀ ga ti-yeei! 
Wɛlɛ, niizu niiti ti telebotala vai ɠɛɛzu, ti loa, ti loka, ti la zooga ti ʋa wuzeɠe. 
