﻿Guyeiti.
33.
Telebo nuiti, à ɠoozunɛ Ɠɔoɠɔ GALAGI ná-faa zu! Mazɔlɔɔ soloogɛ sɔle nuiti ma ga ti maamusɛi wo. 
À Ɠɔoɠɔ GALAGI maamusɛ ga kɔnigi, à guyei loo dɛbi vai ma, ga kɔnigi nii galu puugɔi ga! 
À guye niinɛi loo dɛbi vai ma! À wa-ɠɛingɛin ganiiti gɛin ga pagɔ dɛbi vai ma. 
Mazɔlɔɔ Ɠɔoɠɔ GALAGI laawooi zɔlegɛ, ná-kɛɛwotiiti kpein ta ná-wooɠɛɠiladai lɛɛzu. 
Telebodai nɛɛʋɛ GALA bɛ ta sɔledai. Ɠɔoɠɔ GALAGI ná-wooɠɛɠiladai eteai laavegɛ. 
Ɠɔoɠɔ GALAGI laawooi ɠa é geeɠɔlɔgi ɓɛtɛni la, ta su aniiti kpein ga daa viilɛi. 
Toɠa ɗa kpoloɗɛi ɠaalɛ ba, é siɠito, é kpoloɗɛi zo, é pu aniɲaka wolaiti su. 
Eteai kpein ge lua Ɠɔoɠɔ GALAGI ʋa! Etea nuiti kpein ti ɓali tɔun tuɠɔ! 
Nii nɔpɛ a bona, naama vai ɠa a ɗa ɠɛ, a devei wona, naa ɠa a ɠɛ. 
Ɠɔoɠɔ GALAGI ɠa ɗa zii ɠiligiti ta-lɛnɛ gooiti pu ya, toɠa ɗa ziiti pɛ ti ɠoozu ɠisiɛiti suɠoloɠolo. 
Ɠɔoɠɔ GALAGI ná-tɛnɛ gooiti ta ɗa yɛ ná yeenɔpɛ, ta koozu ɠaaɠisiɛiti ta yɛ ná ɠɔ. 
Undaanɛɛ ɠa zii naati bɛ, niiti Ɠɔoɠɔ GALAGI ga ta-ƓALAGI, ta nuɓusɛiti é yiimazeɠeai ga tiye, ga ti ɠɛ ga nɔnɔiti! 
Ɠɔoɠɔ GALAGI yɛni geeɠɔlɔgi ungaʋɛ, é wɛlɛ, é nuɓusɛiti kpein ka. 
É yɛni zeini zeizuʋɛ, é eteai zu nuiti kpein pɛtɛ. 
Tɔungi é ti kpein zii ɓɛtɛai, é ti-ɠɛɛ vaiti kpein kwɛɛ. 
Masa ge la ná, nii a ɠizo ná-kɔɔɠɔ zɔɔlai mɔin vai ʋɔ, kɔɔɠuluɓa nɔpɛ ge la ná, nii a ɠizo ná-zɛbɛ wolai ʋɔ. 
Ni pilɛ sɔlɔɔ fai ʋe, sooi ɠa ga kito gani nɔ, suvikɛi kpein ge ɓɔsu, naa la nu unmɔɔga. 
Wɛlɛ, Ɠɔoɠɔ GALAGI ɠaazuɠɛzɛi ɠa naati ba, niiti ti luazu tɔun ba, ta niiti ti ɠitogai ná-wooɠɛɠiladai ʋa. 
Naa ɠa a kɛ, é ti ɠula saai ya, é ti-yɛnvui makɛ pulu loo ziɛgi zu. 
Ungo, gi ɠitogɛ Ɠɔoɠɔ GALAGI ʋa, toɠa ga gá-ɓɔba nui ta gá-ɠɔɔɠɔ zɛpɛgi. 
Mazɔlɔɔ gi-yii ɠa ɠoozunɛɛzu ga tɔun maaʋele, mazɔlɔɔ gi laaʋɛ daasei ɲadegai la. 
Ee, Ɠɔoɠɔ GALAGI, ɗa-wooɠɛɠiladai ɠɛ gi ʋɛ, eɠɛʋelei gi è maaɓɔunsu da kitogi zu. 
