﻿Guyeiti.
32.
Davide ná-kidafaawui. Undaanɛ nu ɠa ga naama nui, nii ná-tɔ koloɠologiti maavaayɛgai, ná-kotoiti suvaayɛgai! 
Undaanɛ nu ɠa ga naama nui, nii Ɠɔoɠɔ GALAGI la ná-faaɠaaza golai levezu unma, nii yaava vaa la ziimaʋɛ! 
Siɛgi zu gè maaɠɛni la kpɔ nà-kotoi ma, mà ɠaeiti ti ɠɛni ɠalazu. Gè ɠɛni kpeei loozu foloi laawu ɲɛgɛlɛin. 
Mazɔlɔɔ è-yeei ɠa wuizu mà, folo ʋɛɛ kpidi ʋa, sùvikɛi vɔɔni eɠɛ foɠoi. 
Gè nà-kotoi lɛɛni ga ɗe, gè la nà-faaɠaaza golai maalɔɔɠuni. Gè ɠɛni ma: «Nà laazu zɔ ga Ɠɔoɠɔ GALAGI ʋɛ, ga nà-tɔ koloɠologiti.» Ɗɔun ɗa, è nà-kotoi ma ɠasɔi zeɠeni ùnma. 
Wooɠɛɠila nuɓusɛi kpein ge è vali ɠana, yeeɠɛɠala ʋagɔi zu. Ni ziɛve golaiti ta ɠulana, ti la zeelia ma pɛ. 
Ɗa ga dɔ̀ɔɠuzuʋɛ, ɗa màkɛsu kidaaʋili foloi. Nà wooɠula ga koozunɛɛi, tɔɔzei è màaɠoolia ga ɗa-ɓaamaazui. 
È ɠɛni ma: «Nà è ɠalasu, gè pelei lɛ ga ɗe, nii ɗa ziɛ la. Nà è lɛnɛ, gàazu ɠa yɛ è ʋa. 
À mina ɠɛ ga sooi ɠɛʋele, ɓaa soovale fuului nii ɠi ge la ma, nii nu a ɗa ti ɠili ga galui, ɓaa kalafei, ti maaɠilizu la, nii a kɛ ti maaɓuɠa è ʋa.» 
Taɓa mɔinmɔin ka ɗa zeeli faa ɲɔu ɠɛ nui ma, kɛlɛ nuiti ti ɠigi logai Ɠɔoɠɔ GALAGI ʋa, naati maaɠooliʋɛ ga ná-wooɠɛɠiladai. 
Telebo nuiti, à ɠoozunɛ Ɠɔoɠɔ GALAGI ʋɔ! À wooɠula ga koozunɛɛi, wɔiti wo yiimaʋɛ zɔlegai. 
