﻿Guyeiti.
31.
Guye loo ɠundiɠii nɔnɔi ʋe. Davide ná-guyei. 
Ee, Ɠɔoɠɔ GALAGI, ɗa ɠa gè lɔɔɠuzu è ʋoluʋɛ, màkɛ eyɛsu pɛ, gè mina lɔ unfegi zu! Ùnmɔɔ ɗa-lelebodai zu! 
Woilo gòoi ma, zuvilɛ è ùnmɔɔ! Ɠɛ bɛ̀ ga dɔɔɠuzu vasai, ta siɠigi, nii a kɛ gè ɠizo! 
Mazɔlɔɔ ɗa ɠa è ga nà-fasai, ta nà-siɠigi, è-laaseigi lɛbi vai ma, ɗa lo tùɠɔ, è ɓɔ bà. 
Ɗa kùla tumɔi zu, nii ti seiɗai tùɠɔ, mazɔlɔɔ ɗa ɠa è ga siɠigi é màkɛsu. 
Nà zɛ̀nvui ɠalivaazu è ma, ɗɛi è ùnmɔɔni, Ɠɔoɠɔ GALAGI, gaama ƓALAGI. 
Gè naati wɔinzeɠea, niiti ti ɠilizu zɛɛ zaleiti ba. Nà ɠalivaazu Ɠɔoɠɔ GALAGI ma. 
Nà ɠɛ wuulee ga koozunɛɛi, ɗa-wooɠɛɠiladai maaʋele ma, tɔɔzei è nà-maanɔɠɔi ʋɛtɛga, è ɠida nà-kidaaʋili fai wu. 
È la dɔ̀ɔzu sìli nuiti zeezu, è pìlɛga ɓɔɠɔyeemai zu. 
Màawɔinɠa Ɠɔoɠɔ GALAGI! Mazɔlɔɔ nà kidaaʋiligi zu, ziizoolɛi gàazuʋɛ maaʋooloa, ta zìi ta kpùsɛi kpein. 
Nà-eteai ɓega taɓai zu, nà-konagiti ɓalaa ti ɠɛa kpalagi zu, sùvikɛi ɠula sù, tɔɔzei nà-faaɠaaza golai ʋa, mà ɠaeiti sumiiʋɛ. 
Wɔ̀inzeɠe nuiti kpein ta ɲɛɛɠulazu sù, sìɛɲɔɠɔiti ti ɗa ta ɓɔ ba, kwɛ̀ɛ nuiti ti ɗa lua bà. Niiti ti kàazu eteaʋɛ, naati ti ɗa ɓizɛ, ti ɗa maaɠooza bà. 
Nà-fai yeema nuiti bɛ ti-yiimaʋɛ, eɠɛ nà za. Gè ɠɛa eɠɛ anii nii toai ya. 
Nà naama woo ɲɔiti mɛnisu, niiti ti wosu dàalɔɠɔma: «Maaɠooliʋɛ ga maalua vai.» Ti zoloogɛ ma dàalɔɠɔma, ti yaavai ɠili ga ti zɛ̀nvui ɠula zèa. 
Kɛlɛ nɔ̀un nà, nà ɠalivaazu è ma, ee, Ɠɔoɠɔ GALAGI! Gè ɠɛ ma: «Ɗa ga nà-GALAGI!» 
Nà-eteai ɠa è yeezu, kùla sìli nuiti zea, niiti ti wɔ̀inzeɠezu! 
Yeezei bù ga pagɔ, nà ga ɗa-wotiɠɛ nui! Kìzo ɗa-wooɠɛɠiladai maaʋele ma! 
Ee, Ɠɔoɠɔ GALAGI, gè mina lɔ unfegi zu, siɛgi zu gè wooɠulazu la è ma. Faa ɲɔu ɠɛ nuiti ti yɛ unfegi zu, ti yɛ maaɠɛkpɔgi zu, ti yei gɔvɛalaazu! 
Ti ɠɛ ga ɓoɓoiti, naama lakɔlɔgiti ti ɓɔɛzu ga gaazumaanɛɛi telebo nui laalɔɠɔma, ta wasogi, ta wɔinzeɠemai. 
Ɗa-nuɓɔɠɔlai wɔɔlɔʋɛ gola, nii è makɛgai naati bɛ, niiti ti luazu è ʋa, ta naati ti lɔɔɠuai è ʋolu, nii è ʋaazu kɛɛzu ti ʋɛ, nuɓusɛi kpein gaazu. 
Ɗa ti lɔɔɠuzu è-ɠaazu ma, ti maaɠooza nuɓusɛiti ta-ɠisiɛ ɲɔiti ba, dɔɔɠuzuʋɛ miná ɠa è ti ɠizosu ná, nuiti ti-nɛgiti ma, niiti ti laalɛɛzu ti wu. 
Mamagi ɠa Ɠɔoɠɔ GALAGI ʋɛ! Mazɔlɔɔ é ná-wooɠɛɠiladai ɠulaʋɛ kɛlɛma bɛ̀, nɛ̀i gè ɠɛni eɠɛ taa wolai seiɗai kɛlɛ su. 
Kìgi zupuni, eyɛsu gè ɠɛ ma: «É la mɔ yiizoolɛzu ga ze!» Kɛlɛ è nà-maanɛɛnɛ wooiti mɛnini, siɛgi zu gè wooɠulani la è ma. 
Wɔiti wo ga Ɠɔoɠɔ GALAGI ná-wooɠɛɠila nuiti, à nɛɛʋɛ wo pɛ! Ɠɔoɠɔ GALAGI ɠa ɗa kidaaleʋe nuiti makɛ. Kɛlɛ toɠa waso nuiti sala ga ɲɔuɗa. 
À zɛbɛzeɠe, wo zulo, wɔiti wo ɠitogai Ɠɔoɠɔ GALAGI ʋa! 
