﻿Guyeiti.
26.
Davide ná-guyei. Ee, Ɠɔoɠɔ GALAGI, tukpɔi lo bɛ̀! Mazɔlɔɔ nà nà-eteai ziɛzu peelalazu nɔpɛ ge la bà. Nà ɠalivaazu Ɠɔoɠɔ GALAGI ma, gè la ɲiikpiga eyɛsu pɛ. 
Fɛ̀ɠɛlɛfɛɠɛlɛ, Ɠɔoɠɔ GALAGI, pòluɠula, è zìi ʋɛtɛ, ta nà-kisiɛiti. 
Mazɔlɔɔ gàazu ɠa ɗa-nuɓɔɠɔlai ʋa, nà nà-eteai ziɛzu, eɠɛʋelei ɗa-wooɠɛɠiladai la. 
Gè la liizu gè ʋa zei yaava nuiti koba, gè la woovele nuiti seizeisu. 
Niiti ti faa ɲɔi ɠɛɛzu, naati ta-maaɓɔgi wɔinzeɠeʋɛ mà. Gè la zeizu suɲɔu nuiti koba. 
Nà zèeiti gaagbazu sɔbalalai zu, ee, Ɠɔoɠɔ GALAGI, nà latisu ɗa-zalaɠa ɠulazuʋɛ ma, 
gè mama gooiti bo, gè ɗa-vaanɛɛiti kpein bo. 
Ee, Ɠɔoɠɔ GALAGI, è-zeizuʋɛ nɛɛʋɛ bɛ̀, ʋɛ ɗa-lɛbiyai zeini ná! 
Mina sò ga nu ɲɔiti kɛʋele, mina zɛ̀nvui zeɠe ga nu ʋaa nuiti kɛʋele! 
Ti-yeeiti dɔɔʋɛ faa ɲɔi zu. Ti ɓɔɠɔ yɛgɛna ti ti ɠeya ga lobɛanii. 
Nɔ̀un, nà ziɛzu nà-telebodai zu, ùnmɔɔ, è zaalai la mà! 
Kɔ̀ɠɔi ɠa loni sɔledai zu, nà Ɠɔoɠɔ GALAGI mamasu maaɓɔgi zu. 
