﻿Guyeiti.
25.
Davide ná-guyei. Ɠɔoɠɔ GALAGI, è ʋɔ pelei ɠa gè ɠaaʋotesu ná. 
Nà-GALAGI, ɗa ɠa gè ɠalivaai è ma, mina va bu gè ʋa lɔ unfegi zu, sìli nuiti ti ʋa ɗa ɠoozunɛ nà-faa zu. 
Nii kpein kitogai è ʋa, tanɔpɛ ge la lɔa unfegi zu. Kɛlɛ niiti ti yaavai ɠɛɛzu fuun, naati ta unfe. 
Ɠɔoɠɔ GALAGI ɗa-ʋeleiti dɛɛ ga ze! Kàla ga ɗa-ʋeleiti. 
Lo tùɠɔ gè ziɛ ga ɗa-ɠaamai, è kàla. Mazɔlɔɔ ɗa ɠa è ga nà-kizo GALAGI, ɗa ɠa kìtogai è ʋa folo-o-folo. 
Ɠɔoɠɔ GALAGI, ɠizɛ ɗa-maawɔinɠai zu, ta ɗa-wooɠɛɠiladai, mazɔlɔɔ ta ɠɛʋele ma eyɛsu ɠɔ! 
Mina ɠizɛ nà-doungo ziɛgi ma ɠotoiti su, ɓaa nà-tɔ koloɠologiti ti leʋegai, ɠizɛ sù ɗa-wooɠɛɠiladai maaʋele ma, tɔɔzei, ee, Ɠɔoɠɔ GALAGI, è ʋagɛ! 
Ɠɔoɠɔ GALAGI ʋagɛ, é zɔle, naa ɠa é ba, é pelei lɛɛzu la ga kotoba nuiti, ga ti ziɛ la. 
Toɠa ɗa ɓɔɠɔmaayei nuiti pilɛ telebo pelei ʋa, toɠa ɗa ɓɔɠɔmaayei nuiti kala ga ná-pelei. 
Ɠɔoɠɔ GALAGI ná-peleiti ta ga nuɓɔɠɔlai, ta wooɠɛɠiladai, naati bɛ, niiti ti ga wooɠɛɠila nu, ná-minazeɠegiti su, ta ná-deveiti. 
Ɠɔoɠɔ GALAGI, nà-faaɠaaza golaiti suvaayɛ è-laaseigi ná-lɛbiyai ʋɛ, mazɔlɔɔ ti wola wɔɔlɔʋɛ. 
Nui nii é luazu Ɠɔoɠɔ GALAGI ʋa, Ɠɔoɠɔ GALAGI ɠa pelei lɛ ga naa, nii maanɛai é yiimazeɠe la. 
Toɠa zɛnvui wo undaanɛɛi zu, mavofodai zooi zɔlɔɔ ga nɔnɔ. 
Ɠɔoɠɔ GALAGI ɠa ɗa koozu vaiti dɛɛ ga naati, niiti ti luazu ba. É ti ɠala ga ná-minazeɠegi. 
Gàazu logɛ Ɠɔoɠɔ GALAGI ʋa yeenɔpɛ, mazɔlɔɔ tɔ ɠa é kɔ̀ɠɔi ɠulazu tumɔi zu. 
Ɠaaʋote mà, è kulafiliba vaanɛɛi ɠɛ bɛ̀, mazɔlɔɔ nà ɠila be, màawɔinʋɛ. 
Ziizoolɛi zìi laavega, kìzo nà-ziiɓɔlɔ vaiti ma. 
Nà-maanɔɠɔi ʋɛtɛ, ta nà-kpɔlɔi, nà-kotoiti kpein suvaayɛ bɛ̀. 
Wɛlɛ ʋelei sìli nuiti mɔinɗai la, ta wɔinzeɠema wolai, ti wɔ̀inzeɠezu la. 
Zɛ̀nvui makɛ, è ùnmɔɔ! Gè mina lɔ unfegi zu, tɔɔzei nà lɔɔɠuzu è ʋɔ bɛ. 
Telebodaiti ta sɔledai ta màkɛ, mazɔlɔɔ kìtogɛ è ʋa! 
Ee, GALA, Izilayɛle ɠula ná-kidaaʋili faiti pɛ su! 
