﻿Guyeiti.
21.
Guye loo ɠundiɠii nɔnɔi ʋe. Davide ná-guyei. 
Ee, Ɠɔoɠɔ GALAGI, masagi ɠa ɠoozunɛɛzu è-zɛbɛi zu. Ɗa-zobo sɔlɔɔ fai ɠa gola laavesu ga koozunɛɛi. 
È ziima anii veeni zea, è la ɠɛni ɠɛlɛni, è ʋa ɓe naa veezu zea, nii é ɠɛni falizu è ma. 
È ʋaani bɛ ga tuya ʋagɔiti. È masa bɔɔlɔgi lɔ unba nii é ga zanu kitei. 
É zɛnvui valini è ma, è feeni zea, è sii suɠooza, eyɛsu ɠɔ. 
Ná-lɛbiyai wɔɔlɔa, tɔɔzei ɗa-zobogi ʋɔ, nii è feeni zea, è maayikia, é ɗa volo. 
È kɛɛʋɛ ga tuya ɗɛungi eyɛsu ɠɔ, è daavegɛ ga koozunɛɛi è ɠaazu. 
Masagi ɠa ɓɔɠɔ ɠalivaazu Ɠɔoɠɔ GALAGI ma, nii é Anii-Pɛ-Unda, naa ná-wooɠɛɠiladai ʋɔ, é la ɲiikpiga eyɛsu pɛ. 
Ɗa yeeʋɛɛ è zili nuiti kpein ma, è-yeezai ɠa zeeli è wɔinzeɠe nuiti kpein ma. 
Ɗa ti ɠɛ ga abuzulugi, siɛgi zu è ɠulazu la kɛlɛma. Ɠɔoɠɔ GALAGI ɠa ti maaɓɔle ná-ziiɠaawanai zu, abui ɠa ti ɠala. 
Ɗa ti-mavofodai undaaʋili, é ɠula eteai zu, ti-ma zuwu ɠula fulu nuiti saama. 
Ta faa ɲɔi ɓɛtɛzu è laalɔɠɔma, ti kisiɛ ɲɔiti bo, kɛlɛ ti la zobo sɔlɔɔga. 
Mazɔlɔɔ ɗa ti ɓɛ, ti ʋoluazo, ɗa ɗa-mɛɛin ʋili ti ma. 
Wuzeɠe, Ɠɔoɠɔ GALAGI, ga è-zɛbɛi! Gɔun gá, gá pɔ gi guyei loo, gi ɗa-ʋilɛ sɔlɔɔdai maamusɛ. 
