﻿Guyeiti.
20.
Guye loo ɠundiɠii nɔnɔi ʋe. Davide ná-guyei. 
Ɠɔoɠɔ GALAGI è wooɠaaʋote è ɠidaaʋili foloi! Zakɔɓe ná-GALAGI laaseigi è makɛ! 
É ɗa-ɓɔbai leʋe è ma, é zeɠe seizu ɲadegai, é yɛ Siyɔn é yeezei è wu. 
É ɠizɛ ɗa-vebɛaniiti kpein su. É yeezei ɗa-zalaɠaiti bu ti ɠalazu. 
É è yiima vai ɠɛ è ʋɛ, é naati daazeeli, niiti è pɔ è ti ɠɛ! 
Gá wooɠula ga koozunɛɛi ɗa-zobo sɔlɔɔ fai zu, gá gá-ƓALAGI ná-ɗalapoi lɛ geezu, Ɠɔoɠɔ GALAGI ɠa naa kpein kɛ, nii è falizu ma. 
Gè kwɛɛ niina, ga Ɠɔoɠɔ GALAGI zee ɠa ná-masagi ʋa, nii é gulɔ ɲadegai ziɛni ma, toɠa yɛ ná-ada ɲadegai geezuʋɛ, é gooɠaaʋote, é unmɔɔ, zeezazu ɓɔba wolai ʋɔ. 
Tanigaani zee ɠa ta-ɠɔɔɠɔ wotoloiti ma, tanigaani zee ɠa ta-zooiti ma, gɔun gá, gá-ɠitogi ɠa ga ɗe, Ɠɔoɠɔ GALAGI, gá-ƓALAGI. 
Tiya mu ta ɓilisu ti loo, gɔun, gá yɛsu loni, gi lo kpaan. 
Ɠɔoɠɔ GALAGI, zobogi ve gá-masagi ʋɛ! É zoo é gi wooɠaaʋote, siɛgi zu gi wooɠulazu ma la, ga é ɓɔ gi ʋa! 
