﻿Guyeiti.
19.
Guye loo ɠundiɠii nɔnɔi ʋe. Davide ná-guyei. 
Geeɠɔlɔgiti kpein ta GALA ná-lɛbiyai lɛɛzu, somideɠaiti ti geezuʋɛ, naati ta zeei ná-botii lɛɛzu. 
Folo ɠilagi ɠa zɔɔma voloi ɠalasu ga naa, kpidi ɠilagi faaɠwɛgi ve zɔɔma ɓidii ya ga naa. 
Naa la ɠɛɛzu ga wooiti ɓaa kpɔɛzuɠulaiti, nii nu a zoo mɛnisu. 
Kɛlɛ ti-ma wooi ɠa laazeelizu eteai zu ná pɛ. Ti-wooi ɗa zeeli zou ɓela ga. GALA ge foloi ná-seɠe ɠotai ɓɛtɛʋɛ geeɠɔlɔgi zu. 
Kɛɛʋɛ eɠɛ anzazini niinɛi, nii é ɠulazu daa ʋɛlɛi wu, eɠɛ pilɛ sɔlɔɔ nui, é liizu luɠɔ, koozunɛai ga é kpizɛi lɔɔzei! 
Toɠa ɠulazu geeɠɔlɔgi ɠwɛgi, é ná-kpizɛi ɠaaɓela zɔɔla ʋelei, ani nɔpɛ ge la lɔɔɠua ná-diegi ʋa. 
Ɠɔoɠɔ GALAGI ná-tɔgi laazeeliʋɛ, toɠa ɗa nu yii niinɛ. Ɠɔoɠɔ GALAGI ná-zeele wooi ɠa ga gaamai, toɠa ɗa ɠimalai ve ɠimalala nui ʋɛ. 
Ɠɔoɠɔ GALAGI ná-deveiti sɔlegɛ, ta ɗa nu ɠoozunɛ. Ɠɔoɠɔ GALAGI ná-deveiti suɠalagɛ, ta ɗa nu ɠaazuzeɠe ma. 
Ɠɔoɠɔ GALAGI ɠaazuluabai ɠoleʋɛ, toɠa yɛ kɛʋele ma eyɛsu ɠɔ. Ɠɔoɠɔ GALAGI ná-deveiti ta ga gaamai, ti zɔlegɛ gola. 
Ti vizɔgɛ zanugi ʋa, anɛɛ zanu mɔinmɔingiti, niiti ti-ma nɔɠɔi ɠulaai ti ʋa. Ti ɲɛmigɛ kɔin gulɔi ʋa, anɛɛ kɔin gulɔi nii é ɠulazu ɓɔɠɔ ʋɛ ma zɛpɛgi ʋa. 
Ɠɔoɠɔ GALAGI, ɗa-lɔgiti ti ɗa-wotiɠɛ nui loa ɠisu, é ná-kulanuma wola zɔlɔɔgɛ ti zu. 
Ɓɛ ɠa é tɔ ɓɔɠɔi ná-gaaɠilimalala vaaɠaazagi ɠwɛɛsu? Màavaayɛ ga nà-kotoiti, ti lɔɔɠuai, gè la ti ɠwɛɛ. 
Nà ga ɗa-wotiɠɛ nui, màkɛ, gè mina gaaɠilima ɠoto ɠɛ! Ti mina pilɛ sɔlɔɔ mà ga tago ɓalaa! Nà ɠɛ ga telebo nu, gè ɠɛ ga sɔbalala nu, tɔ koloɠologiti faa zu. 
Yeezei dàawooiti bu ga pagɔ, ta kòozu ɠisiɛiti è ɠakala, ee, Ɠɔoɠɔ GALAGI, nà-fasai, ùnmɔɔ nui! 
