﻿Guyeiti.
18.
Guye loo ɠundiɠii nɔnɔi ʋe. Ɠɔoɠɔ GALAGI ná-botiɠɛ nui Davide ná-guyei. É niima wuyei looni Ɠɔoɠɔ GALAGI ʋɛ, siɛgi zu naa unmɔɔni da, é kula sili nuiti kpein zeezu, ma un ge la ma mɛɛ ga Sayile. 
É ɠɛni ma: «È nɛɛʋɛ bɛ̀, Ɠɔoɠɔ GALAGI, nà-zobogi! 
«Ɠɔoɠɔ GALAGI ɠa ga nà-fasai, nà-siɠigi, ùnmɔɔ nui, nà-GALAGI, nà-fasai, ʋɛ gè lɔɔɠuzu ná, nà-kɔɔɠɔ zɛpɛgi, zobogi nii é kìzosu, nà-siɠi gaaɠoozagi! 
Mamagi ɠa Ɠɔoɠɔ GALAGI ʋɛ! Siɛgi zu gè tolini da, gè vieni, gè ɠula sìli nuiti kpein zea. 
«Saai gìlini ga ná-galuiti, é ɗa màalua, eɠɛʋelei kɔtuɗɛi la, é faa zuɠoloɠologi ɠɛɛzu. 
Gɔvɛalaazu ɠaluiti ti veleveleni mà, saai ná-tumɔiti ti ɠɛ tùɠɔ, ti ɗa màalua. 
Nà-kidaaʋiligi zu, gè wooɠulani Ɠɔoɠɔ GALAGI ma, gè ɓainni nà-GALAGI woizu, é yɛni ná-masa pɛlɛi wu, é gòomɛni, nà-kpee wooi looni goizu. 
«Naazu, zooi ɓalini, é ɲiikpi, gizeiti ma wuulaagiti ti ɓalini, ti ɲiikpi ná-ziiɠaawanai maaʋele ma. 
Duului ɠa ɠulazu sokpayeɠeiti su, abui nii é galai wosu, naa ɗa ɠula daaʋɛ, ga tiɠilekai é ɗa ɠala. 
É geeɠɔlɔgi ziɛni su, é yei, tonaɓiin gaaɠiligai kɔɠɔi wu. 
É lɛɛni seeluɓɛin ɠɔma, é ɗa ɠoʋe, é ʋa fiilɛi ɠoʋegiti kɔma. 
É kpidii latini ɓɔɠɔ ma, é lɔɔɠu ma ɓiligi zu, fiilɛ wolai ma ɓidii zu, tonaɓiin gaaɠiligai zu. 
Wozakalagi é ɠɛni volozu tuɠɔ, sakɔtui ta abulekai niiti ti ɠɛni ɠulazu su, naati ti ɠɛni leʋesu tonaɓiingi zaama. 
Ɠɔoɠɔ GALAGI ɠa zikɔzu geeɠɔlɔgi zu, GALA nii é Anii-Pɛ-Unda, naa wooi ɠa ɠulazu. 
É ná-mɛɛinti pilini ga é sili nuiti suvaza, é mainmainti pilini, nii a kɛ ti ʋoluazo. 
Kpoloɗɛi ɓomaʋɛ ɠulani kɛlɛma, eteai ma wuulaagiti maa ɠɛ kala, Ɠɔoɠɔ GALAGI ná-kpaazaɠai ʋɔ, ta sokpayeɠeiti su viilɛi ʋɔ! 
«É yeemaaleni, é yɛ geezuʋɛ, é nɔ̀un so, é mɛ̀ɛn, é kùla ziɛ wolaiti ga. 
É kùlani sìli nu wolai ya, niiti ti wɔ̀inzeɠezu, tama ti zuɓaai nɔ̀un ba. 
Ti wuzeɠeni dàalɔɠɔma nà-kidaaʋili foloi, kɛlɛ Ɠɔoɠɔ GALAGI ɠa é loni pòlu. 
É kùlani faaɓaagi zu, é kùlani, mazɔlɔɔ nɛ̀ɛʋɛ bɛ. 
«Ɠɔoɠɔ GALAGI vaani bu, é sò eɠɛʋelei nà-telebodai la, é kɛ bɛ̀, eɠɛʋelei zèeiti ɲade pelei la, 
mazɔlɔɔ gè Ɠɔoɠɔ GALAGI ná-peleiti sogɛ, gè la maaɠoozani nà-GALAGI ʋa, ga faa ɲɔu ɠɛɛ vaa maaʋele. 
Gàazu ɠa ná-tɔgiti ba yeenɔpɛ, gè la ɗa ga ná-deveiti daa ɠoba. 
Gè ɠɛni ga ziimai ɠɛ nui, gè ɓɔɠɔ zoni ga gè mina faaɠaaza gola ɠɛ. 
Ɠɔoɠɔ GALAGI sàlani nà-telebo fai maaʋele ma, eɠɛʋelei zèeiti ti ɲadeni da tɔun gaazu. 
«Zɔi é è ʋɛ ga wooɠɛɠila nui, ɗa ɠɛ naa ʋɛ ga wooɠɛɠila GALAGI, zɔi peelalazu la ba, peelalazu la è ʋa naa letema. 
Zɔi ɲadegai, ɗa ɗa-ɲadedai lɛɛzu ga naa, niiti ti ga yaava nuiti, ɗa ɗa-ɠimalai lɛɛzu ga naati. 
Mazɔlɔɔ ɗa ɠa è maanɔɠɔ nuiti kizosu, è gaazulɛɛ nuiti gaazumaayei. 
Ɗa ɠa è nà-wozakalagi volozu, ee, Ɠɔoɠɔ GALAGI, nà-GALAGI, ɗa nà-kpidii zu ɠɛɛzu kala. 
Ni ɗa bà, nà ʋili salaʋusu ɓulugi zaama, ni nà-GALAGI ɠa bà, nà ʋili gè ɓudɛ siɠigi maazu. 
«GALA ná-peleiti daazeeliʋɛ, Ɠɔoɠɔ GALAGI laawooi ɠoleʋɛ. GALA ka ga kɔɔɠɔ zɛpɛgi naati kpein bɛ, niiti ti lɔɔɠuzu tɔun polu. 
Mazɔlɔɔ ɓɛ ɠa é ga GALA, ni Ɠɔoɠɔ GALAGI laade? Ɓɛ ɠa é ga fasai, ni gá-ƓALAGI laade? 
GALA ka é sàamaɠilizu ga zɛbɛi, é nà-pelei ɓɛtɛ ga pagɔ. 
Toɠa kɔ̀ɠɔiti kɛɛzu, eɠɛ dopai ɠɔɠɔiti, é tò ada ɠaaɠoozagiti. 
Tɔ ɠa é màalɛlɛzu ga kɔɔɠɔ vai, mɛɛin é ga kɔlu ɓɔigi kpili fai ɓaai, zèeiti ta mɛɛn ɠae ʋilisu ga naa. 
Unmɔɔgi è bosu ga ze, naa ɠa é ga nà-kɔɔɠɔ zɛpɛgi, ɗa yeezeizu bù ga è-yeezai. Ɗa-ɓɔbaiti ta sɛ̀bɛlɔɔzu. 
È-zaalai zu, nà ziɛzu valafala, kɔ̀ɠɔiti ti la liizu ga. 
«Nà ʋilɛsu sìli nuiti polu, gè yeezeeli ti ma, gè la ɠalega ma, ni gè la ti-ma zuwu ɠaaleʋeni. 
Nà ti ʋalizu ga, ti la zooga ti ʋa wuzeɠe, ti loo kɔ̀ɠɔ wu. 
Ɗa sàamaɠilizu ga zɛbɛi kɔɔɠɔ vai ma, ɗa sìli nuiti toozu bu bɛ̀. 
Ɗa sìli nuiti kpɛɛzu tùɠɔ, nà wɔ̀inzeɠe nuiti koloɠolo. 
Ta kpee loozu ga ti kpɔba zɔlɔɔ, ti la sɔlɔɔni, ni ta Ɠɔoɠɔ GALAGI lolina, naa la ti wooɠaaʋotesu! 
Nà ti ɠɛɛzu ga fufiligi, nii fiilɛi liizu la, gè ti ɓale eɠɛ pele zu ʋalaʋalagi. 
«È kùla nà-nuɓusɛiti ta-ɓaka fai laawu, è sèiɗa zii ɠiligiti unda ga kundiɠii. Nuɓusɛiti gè la ti ɠwɛɛ, naati ta botii ɠɛɛzu bɛ̀. 
Nà ti levena nɔ feya, ti ɠolo bɛ̀ gaamanɔ. Wɛɛinti ta ʋaazu, ti ɗa tɛ̀ su. 
Wɛɛinti ta iɲɔteʋei zu, ti zasu ɗa ɓali, ta ɠɛna ɠulaa ta-ziɠigi zu. 
«Ɠɔoɠɔ GALAGI ɠa vulua! Mamagi ɠa bɛ, tɔ ɠa é ga nà-fasai! Ɛsɛ pɛ ge nà-kizo GALAGI maamusɛ, 
GALAGI é zobo feezu bɛ̀, gè nɔ̀nɔ ʋotokula, é ziiti kolozu bɛ̀, 
ɗa kùlazu sìli nuiti zea. Ɗa sèizu wɔ̀inzeɠe nuiti unda, è kùla nu ɲɔiti zea! 
Naa ɠa é ba, nà è maamusɛ zii ɠiligiti saama, ee, Ɠɔoɠɔ GALAGI! Nà guyei loo è-laaseigi lɛbi vaa ma. 
Ɠɔoɠɔ GALAGI unmɔɔ faa wolai ɠɛa ná-masagi ʋɛ. Toɠa wooɠɛɠiladai ɠɛɛzu naa ʋɛ, nii gulɔ ɲadegai ziaai ma, nii é ga Davide, ta mavofodai, eyɛsu ɠɔ!» 
