﻿Guyeiti.
17.
Davide ná-GALA falii. Ɠɔoɠɔ GALAGI, woilo màavai ma, nii sɔlegai. Woilo nà-kpee wooiti ma. Woiyeɠei laalao nà-maanɛɛnɛ wooi luɠɔ, nii gè kɛɛzu ga dakɔlɔgi, nii yaava la ba. 
È nà-telebodai ɠula kɛlɛma, è-ɠaazuʋɛti ti telebodai wuuzumɔ. 
Zìi zumɔ, è wɛlɛ mà kpidii, ɗa pòluɠula, è la faa nɔpɛ kaa. Gè deveʋɛ ga gè mina koto ɠɛ kpɔɛzuɠulai zu. 
Nuɓusɛiti ti ɠɛ ʋa faa nɔpɛ kɛɛzu, nà ɓɔɠɔ zosu ga è-laawooiti, gè mina ziɛ ga faa ɲɔu ɠɛ nuiti ta-ʋeleiti. 
Gè ziɛni ɗa-ʋeleiti su, kɔ̀ɠɔiti ti la ɲiikpini. 
Ee, GALA, nà wooɠulazu è ma, mazɔlɔɔ ɗa gòoɠaaʋote! Woii lati dɛɛ mà, è woilo gòoi ma! 
Ɗa-wooɠɛɠiladai ɠula kɛlɛma bɛ̀, ɗɛi è naati kizosu toosu nuiti ma, niiti ti lɔɔɠuzu ɠaiziɛzu è ɠobaʋɛ. 
Makɛ mà ga nu ɠaazuleegi ɠɛʋele, dɔ̀ɔɠu è-ɠoʋegiti ma niinigi wu, 
màaɠooza sìli nuiti ba, ti wɔ̀inzeɠezu, màaɠooza faa ɲɔu ɠɛ nuiti ba, ti latisu mà. 
Maawɔinɠa la ti-yiimaʋɛ, ti-laaʋɛ ɗa waso kpɔɛi wo, 
ta kɔ̀ɠɔʋo ba, ti ɠoolia mà, ta ɠaazulosu bà, ti ʋa gàavala zooi ma, 
eɠɛ zalai nii pului ma, é anii zosu é bali ga, eɠɛ zala yiʋoi nii dɔɔɠuai makɛsuʋɛ. 
Ɠɔoɠɔ GALAGI wuzeɠe, è li è ti laaɠomi, è ti ɠaavala! Kìzo, è kùla faa ɲɔu ɠɛ nuiti zea, ga ɗa-woɠa zɔkpɔi. 
Ɗɔun kìzo niima nuiti ma, è-zɛbɛi ʋɔ, ee, Ɠɔoɠɔ GALAGI! Kùla etea nuɓusɛiti zea. Ta-ɠulanumai ɠwɛɛ ge ɠɛ ga eteai zu nɔ! Ungo, ti yiɠo, tiya-o, ti-lointi-yo, ga naa, nii è makɛsu ti ʋɛ. Ti yiɠo la, ti mɔtai yɛ, ti-mavofodai ya! 
Nɔ̀un nà, nà-telebodai ʋɔ, nà è-ɠaazuʋɛ ɠa, nà wuzeɠena feya, è-maaniinigi ɠa zìɠo! 
