﻿Guyeiti.
16.
Davide ná-guyei. Ee, GALA, màkɛ! Mazɔlɔɔ nà lɔɔɠuzu è ʋɔ bɛ. 
Nà ɗa ɠɛ Ɠɔoɠɔ GALAGI ma: «Ɗa ga Màliɠii, ɗa ga nà-undaanɛɛi, taɠili nɔpɛ ge la ná, a ùndaanɛ!» 
Nu ɲadegaiti ti zooi zu, tiya ɓɔɠɔi, ti ga nu wolaiti, naati ka nà ɗa unfe ti ma. 
Taɠiligaa ta undaanɛɛi ɠaiziɛzu gala kiligiti zea, ta ta-ɓɔlɔi mɔinzu ɓɔɠɔ ma. Gè la ta-ʋuya zalaɠa ɠula, nii é ga ɲamai, gè la ti-laasei boga ga dàkɔlɔgiti. 
Ɠɔoɠɔ GALAGI ɠa é ga nà-kulanumai, ta nà-undaanɛɛi, poganii nii gè sɔlɔɔgai, ɗa ɠa è ɓaazu maazu. 
Gè nɔ̀nɔ ma ʋoganii zɔlɔɔga, nii fizɔgai, toɠa bɛ̀ ga poganii, é kòozunɛɛzu. 
Nà Ɠɔoɠɔ GALAGI mamasu, nii é tɛ̀nɛsu. Zìi ɓɔɠɔi ɠa ɗa gàanɛɛnɛ kpidii. 
Gàazu logɛ Ɠɔoɠɔ GALAGI ʋa yeenɔpɛ, mazɔlɔɔ toɠa kòbaʋɛ, nii a kɛ gè mina ɲiikpi eyɛsu pɛ. 
Naa ɠa é ba, zìi ɠaanɛa, zɛ̀nvui ɗa ɠoozunɛ, kpùsɛi ɓɔɠɔi ɠa looɠosu, makɛgai kitogi zu. 
Mazɔlɔɔ è la ɠɛlɛa bà, gè ʋa yɛ gɔvɛalaazu, è la vaa bu ɗa-wotiɠɛ nui, é ga wooɠɛɠila nui, é ʋa yei zeɠei zu. 
Ɗa zɛnvu ʋelei lɛ ga ze, koozunɛ wolai ɠa è ɠakalaʋɛ, ta ɠɔoɠɔ undaanɛɛi è yeezazuʋɛ. 
