﻿Guyeiti.
14.
Guye loo ɠundiɠii nɔnɔi ʋe. Davide ná-guyei. Ɠimalala nui ɠa ɗa bo yiimaʋɛ ga: «GALA ge la ná!» Ti ɠakagɛ, ti telebotala ɲɔi ɠɛa, ta maaɲɛɛba vaiti. Gila kpalaa ge la ná, nii é faa ʋagɔ ɠɛɛzu. 
Ɠɔoɠɔ GALAGI yɛni geeɠɔlɔgi ungaʋɛ, é unpilɛ, é nuɓusɛiti pɛtɛ zooi ma, é pɛtɛ, ni nu ɠila kpalaa ka ná, nii ɠi pagɔ ma, é GALA gaiziɛzu. 
Ti pɛ ti ɠakaga, ti kpein ti ɠɛa ga yaava nuiti ʋɔɔma, taɠila kpalaa ge la ná, nii é faa ʋagɔ ɠɛɛzu, anɛɛ gila kpalaa. 
Nii kpein é telebotala vai ɠɛɛzu, ti la faa ɠaaɠaazu ɓaa? Tɛi ti nà-nuɓusɛiti numasu, eɠɛʋelei nu a ɗa ɓului numa da, ti la wooɠulazu Ɠɔoɠɔ GALAGI ma. 
Naa ɠa ti zasuɓalizu la ga duai, mazɔlɔɔ GALA ka telebo nuiti ba. 
Wa pɔ wo maanɔɠɔ nuiti kisu vaa ʋagɔiti falibo ti unfe. Kɛlɛ Ɠɔoɠɔ GALAGI ɠa ga ti-lɔɔɠuzuʋɛ. 
Nɔ̀un wɔ̀inʋɛ ga gè Izilayɛle ná-kizo fai ɠa, nii é ʋaazu Siyɔn gizei ma! Siɛgi zu Ɠɔoɠɔ GALAGI ná-nuɓusɛiti ta-vai valibosu da, Zakɔɓe mavofodai ɠa ɠoozunɛ, Izilayɛle ɠa ɠɛ koozunɛɛi zu! 
