﻿Guyeiti.
11.
Guye loo ɠundiɠii nɔnɔi ʋe. Davide ná-guyei. Dɔ̀ɔɠuzuʋɛ ɠa ga Ɠɔoɠɔ GALAGI ʋɔ bɛ. Wa zoo ɠale ɠɛɛzu mà: «Ʋela è li gizeiti ma, eɠɛ wɔni»? 
Mazɔlɔɔ faa ɲɔu ɠɛ nuiti ta mɛɛin ɠaalɛɛzu, ti mɛɛn ɠaei ɠɛʋele ɓɛtɛ galui ma, ti ʋa pili naati ma kpidii zu, niiti ti-yii zɔlegai. 
Siɛgi zu ma ɓogiti ti lokasu da, leeni ɠa telebo nui a kɛ? 
Ɠɔoɠɔ GALAGI ɠa sei ʋɛlɛ ɲadegai wu. Ɠɔoɠɔ GALAGI ná-masa kpɔkpɔgi ɠa geeɠɔlɔgi zu, gaazuʋɛ ɠa wozaɠaazu, toɠa wɛlɛzu ga ɠaazuʋɛ, é ɗa nuɓusɛiti sumɔ. 
Ɠɔoɠɔ GALAGI ɠa telebo nui ta faa ɲɔu ɠɛ nuiti ta-vai wuuʋɛtɛsu. Toɠa naama nui wɔinzeɠezu, nii toomai nɛai bɛ. 
É abulekai ʋu kae faa ɲɔu ɠɛ nuiti ma, nii é ɠalazu ga timinigi. Fiilɛ ɓadii nii é galai wosu, naa ɠa é ga ta-ɠulanumai. 
Mazɔlɔɔ Ɠɔoɠɔ GALAGI zɔlegɛ, telebo faiti nɛɛʋɛ bɛ. Nuiti ti zɔlegai, naati ta gaazuʋɛ ʋɛtɛ. 
