﻿Guyeiti.
9.
Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Zunu loin ná-saai». Davide ná-guyei. 
Nà Ɠɔoɠɔ GALAGI maamusɛ ga zìimaʋɛ pɛ, nà ɗa-vaa ʋagɔi kpein bo. 
Nà ɠoozunɛ è ʋɔ, gè ɠoozunɛ gola, nà guyei loo è-laaseigi lɛbi vai ma, GALA nii é Anii-Pɛ-Unda! 
Siɛgi zu sìli nuiti ti ɠulazu la ʋolu, ti-ɠɔɠɔi ɠa ɗa ziɠa, ti undaaʋili è ɠakala. 
Mazɔlɔɔ è màaloboga, è bà vai ɠaaɠula ba, ɗa zeizu ɗa-masa kpɔkpɔgi ɠa, ga tukpɔɠaaleʋe nui sɔlegai. 
Ɗa ɓaazaɠazu zii ɠiligiti ma, è faa ɲɔu ɠɛ nui undaaʋili, è ti-laaseigi ɓale eyɛsu ɠɔ. 
Sili nu nɔpɛ ge la mɔ ná. Ti ɠoloɠologa eyɛsu ɠɔ, mazɔlɔɔ è ta-laa wolai lokaga, zeemai woga ti ma. 
Kɛlɛ Ɠɔoɠɔ GALAGI ɠa sei wosu yeenɔpɛ, é ná-masa kpɔkpɔgi ʋilɛni tukpɔɠaaleʋe vai ma. 
Tɔ ɠa é zeini eteai unda ga telebodai, é ɗa ziiti pɛ tukpɔɠaaleʋe ga sɔledai. 
Ɠɔoɠɔ GALAGI ɠɛ ga siɠigi maanɔɠɔ nui ʋɛ kae, é ɠɛ bɛ ga siɠigi kidaaʋili siɛgi zu. 
Niiti ti è ɠwɛɛ, naati ti la è la. Mazɔlɔɔ ɗɔun ɗa, Ɠɔoɠɔ GALAGI, è la ɠɛlɛa nu ʋa, nii é ɠaaʋotesu è ma. 
À Siyɔn masagi Ɠɔoɠɔ GALAGI lɛbi ga guyeiti, faa wolaiti é ti ɠɛai, à naati bo zii ɠiligiti saama! 
Mazɔlɔɔ toɠa ɗa ɲama ʋui ʋotokula, ki ge la ɠula su, é la yeema maawɔin nuiti ta-ɓee wooi ma. 
Ee, Ɠɔoɠɔ GALAGI, màawɔinɠa! Kpɔlɔi ʋɛtɛ, nii wɔ̀inzeɠe nuiti ti dɔ̀ai su. Ɗa ɠa è lɛɛzu ga ze, è kùla saai ma ziɠidaʋɛ, 
nii a kɛ è maamusɛ wooi wo Zeluzalɛme taa ziɠidaʋɛti, gè ɠɛ koozunɛɛi zu, tɔɔzei gè è zɔlɔɔga ga nà-kizo nui. 
Zii ɠiligiti ta loozu zeɠei zu, nii ti bɔai ga ti-yeeiti, ti-ɠɔɠɔiti ta lɔɔzu tumɔi zu, nii ti seini dɔɔɠuzu. 
Ɠɔoɠɔ GALAGI ɠa ɓɔɠɔ lɛɛzu, é sɔledai ɠɛ. Toɠa faa ɲɔu ɠɛ nui zosu, ga naa ɓɔɠɔi ná-balii. 
Faa ɲɔu ɠɛ nuiti, ta zii ɠiligiti, ti la yiizoolɛzu ga GALA ná-faa, naati ta li gɔvɛalaazu. 
Kɛlɛ GALA ge la yeema pɛ maanɔɠɔ nuiti ma, eyɛsu ɠɔ, maawɔin nuiti ta-ɠitogi la ɠoloɠologa eyɛsu ɠɔ. 
Wuzeɠe, Ɠɔoɠɔ GALAGI, nui mina pilɛ sɔlɔɔ! Zii ɠiligiti to ɠaazu, è ta-lukpɔi ɠaaleʋe. 
Ee, Ɠɔoɠɔ GALAGI, dualuagi lɔ ti zu! Nuɓusɛi naati ti kwɛɛ ga ta ga nuiti nɔ. 
