﻿Guyeiti.
8.
Guye loo ɠundiɠii nɔnɔi ʋe. Davide ná-guyei. É loozu kɔnigi ɠa, nii é zeɠezu Gate taazuʋɛ. 
Ɠɔoɠɔ GALAGI, gi-Maliɠii! È-laaseigi maayikiʋɛ, eteai zu ná pɛ! Ɗa-maayikii é volozu, è naa zeiɗa geeɠɔlɔgi maazuʋɛ. 
È lɛbiyai lɔa doungoiti daaʋɛ, ta ɲiimiɓɔlegiti, è wɔinzeɠe nuiti ta-vaa zu, è è zili nuiti gaalɛi, ta potokula nuiti. 
Siɛgi zu nà geeɠɔlɔgiti pɛtɛna da, ti ga ɗɔnɔiti, è-yeei ti ɓɛtɛai, alugi ta somideɠaiti, è ti ɲɛkpɛai: 
Nuɓusɛi ɠa ga leeni, è ʋa ɠigaiziɛ su? Nui ɠa ga leeni, è ʋa yiizoolɛ la? 
Anɛɛ naa ʋe, è kɛɛʋɛ ga GALA ná-seikobai nɔ, è lɛbiyai ta unfemai veeʋɛ bɛ, ti ɠɛ unma ga masa bɔɔlɔgi. 
È zobogi veeʋɛ bɛ, ga é masadai ɠɛ anii kpein unda, è-yeei ti ɓɛtɛai, è ti pɛ puuni kɔɠɔwu, 
toganiiti pɛ, ma wolaiti ta ma goiti, anɛɛ dɔɓɔ zuaiti ɓalaa, 
ta wɔniiti, ta kaleiti, ta niiti kpein ti ziɛzu ziɛiti bu. 
Ɠɔoɠɔ GALAGI, gi-Maliɠii! È-laaseigi maayikiʋɛ, eteai zu ná pɛ! 
