﻿Guyeiti.
7.
Davide ná-maawɔin wuyei, é tooni Ɠɔoɠɔ GALAGI ʋɛ, é ʋilɛ Kuse ʋa, Ɓɛnzamɛn nui. 
Ɠɔoɠɔ GALAGI, nà-GALAGI, nà lɔɔɠuzu ɠaiziɛzu è ʋɔ bɛ, kìzo wɔ̀inzeɠe nuiti kpein ma, ùnmɔɔ, 
nii a kɛ ti mina bàli ga eɠɛ zalai, nii a ɗa li ga anii, nu la kula zea. 
Ee, Ɠɔoɠɔ GALAGI, ná-GALAGI, ni gè naa ɠɛɛʋɛ, eɠɛʋelei ti pèelalazu la, ni gè ɲamaba vaa ɠɛɛʋɛ, 
ni gè ɓaaɠogɛ bɔ̀ɔlai ta ma, ni gè sìli nui ta maavoogɛ, un ge la ba, 
naazu sìli nui ʋilɛ pòlu, é sò, é ɠɔɠɔlo mà, é nà-lɛbiyai ɓokpo fufiligi zu. 
Wuzeɠe, Ɠɔoɠɔ GALAGI, ɗa-yiiɠulagi zu, wɔ̀inzeɠe nuiti ta-yiiɠulagi laalɔɠɔma, ɠaaɓa mà, ɗɛi è faa zɔle fai leveai! 
Ziiti ti maaɓɔ è-maaɠoolii zu, ɗɔun ɗa zei ti unda, è yɛ zeini naa maazuʋɛ, ɗa-masa kpɔkpɔgi ɠa. 
Ee, Ɠɔoɠɔ GALAGI, ɗɛi è ga ziiti pɛ tukpɔɠaaleʋe nui, tukpɔi lo bɛ̀, kɛ eɠɛʋelei nà-sɔledai la. É ɠɛ bɛ̀ eɠɛʋelei nà-sɔbalalai la. 
Pele ɓesa faa ɲɔu ɠɛ nuiti ta-vaa ɲɔi luɠɔ, telebo nui ɠɔɠɔ losu ɓɛtɛ, ɗɛi è nuiti ziimaʋɛ ʋɛtɛsu, ta ta-ɠisiɛi, telebo GALAGI. 
GALA ka é ga nà-kɔɔɠɔ zɛpɛgi. Nii zii zɔlegai, toɠa naa ɠizo. 
GALA ka ga tukpɔɠaaleʋe nui nii sɔlegai, nii a ɗa ná-ziiɠaawanai ɠula kɛlɛma voloi faaɠaazagi a ɠɛ la, 
nui naa laalɔɠɔma, nii é la ʋaazu pɔ. GALA ka ɗa ná-boɠa zɔkpɔi ɠaali, é ná-mɛɛin zumɛɛn, é kɛʋele ɓɛtɛ. 
Toɠa kɔɔɠɔ zɔɔlaiti kpɛtɛzu nu ʋaa vai ma, é mɛɛinti kpɛtɛ niiti abui ti ʋa. 
Wɛlɛ, faa ɲɔu ɠɛ nui ɠa telebotalai ɠɛʋele ɓɛtɛzu, toɠa kogi zeɠezu ga faa ɲɔi, é sɔlɔɔ ga zɛɛ vai. 
Toɠa zeɠei wɔɔzu, é bɔ, é loo zeɠei zu, nii é bɔai. 
Ná-faa ɲɔi ɠa loozu tɔ ɓɔɠɔi unma. Ná-suɲɔulai ɠa loozu toʋalaʋɛ. 
Nà Ɠɔoɠɔ GALAGI maamusɛ ná-telebodai maaʋele ma, nà guyei loo Ɠɔoɠɔ GALAGI laaseigi lɛbi vai ma, GALAGI nii é Anii-Pɛ-Unda geezuʋɛ. 
