﻿Guyeiti.
6.
Guye loo ɠundiɠii nɔnɔi ʋe. É looni ga kɔnigiti, niiti galu lɔsaʋai ti ɠa. Davide ná-guyei. 
Ɠɔoɠɔ GALAGI, mina dòɠa ɗa-yiiɠaawanai zu, mina kòlo ɗa-yiiɠulagi zu. 
Ɠɔoɠɔ GALAGI, màawɔinɠa, mazɔlɔɔ zɛbɛ nɔpɛ ge la mɔ bà! Ɠɔoɠɔ GALAGI, bàlo, mazɔlɔɔ sàsu ɠa ɓalizu, 
zìi ɗa wola ɓali. Yeelɛ ɠa è ʋaazu la Ɠɔoɠɔ GALAGI, nà-kpɔba vai ma? 
Ʋa bɛ̀ mɔnɔ, Ɠɔoɠɔ GALAGI, è ùnmɔɔ, kìzo ɗa-wooɠɛɠiladai maaʋele ma. 
Mazɔlɔɔ niiti ti zaai, naati ti la zooga ti ʋa ɠisiɛ è zu! Ɓɛ ɠa a zoo é è maamusɛ gɔvɛalaazu? 
Gè yɛga kpalagi wola wosu, gaaɓaai ɠula sù, nà laani nà-betei zu, kpidii kpein gè ɗa wɔlɔ, dàazuʋɛ yɛɓɛa, é lɛilɛi ga gàazuɗɛi. 
Gàazuɠɛzɛiti ti wɔlɔzaɠaga ga ziizoolɛi, ta wɔlɔzaɠasu, tɔɔzei sìli nuiti ta-vaa zu. 
À maaɠooza bà, faa ɲɔu ɓɛtɛ nuiti, mazɔlɔɔ Ɠɔoɠɔ GALAGI nà-gɔlɔ wooiti mɛnini. 
Ɠɔoɠɔ GALAGI yeezeini nà-maanɛɛnɛ wooiti bu. Ɠɔoɠɔ GALAGI vaani nà-maanɛɛnɛ wooi wu. 
Sìli nuiti kpein ta unfe, ti zasuɓali, ti ɠula ʋolu gaamanɔ, ti pɛ ti unfe. 
