﻿Guyeiti.
5.
Guye loo ɠundiɠii nɔnɔi ʋe. É loozu ga kooleiti. Davide ná-guyei. 
Ɠɔoɠɔ GALAGI, woilo gòoi ma! Kpalagi gè bosu gaaɠa! 
Ɠida nà-kpee loligi wu, nà-masagi, nà-GALAGI, mazɔlɔɔ ɗa ɠa gè è valizu. 
Ɠɔoɠɔ GALAGI, gosui, ɗa ɗa gòoi mɛni, sobui, nà ɗa ʋa è ʋɔ bɛ, gè ɗa è maaɓɔun. 
Mazɔlɔɔ è la ga GALAGI, nii faa ɲɔi nɛai bɛ. Faa ɲɔi la zeizu zɔlɔɔga è ɠobaʋɛ. 
Ɠimalala nuiti ti la zooga ti ʋa lo è ɠaazu, naati wɔin la è ma, niiti ti faa ɲɔi ɠɛɛzu. 
Ɗa zɛɛ wo nuiti kpein undaaʋili. Nu ʋaa nuiti ta yaava nuiti wɔin la Ɠɔoɠɔ GALAGI ma. 
Ɗa-wooɠɛɠilada wolai ʋɔ, nii kpela ge la ba, nà zoo gè lɛ ɗa-ʋɛlɛi wu, è ɠaazuluabai é zèa, nà nɔkɔ è wu, è zei ʋɛlɛ ɲadegai wu. 
Ɠɔoɠɔ GALAGI, lo tùɠɔ ɗa-lelebodai zu, sìli nuiti maaʋele ma. Ɗa-ʋelei ɠaa ɠɛ sɔli tùɠɔ. 
Mazɔlɔɔ nu nɔpɛ ge la laa ti-wooiti da, ti ɠoozu ɠisiɛi kpein ka ga faa ɠoloɠologi, ti-ɠɔdayeɠei ɠɛɛʋɛ eɠɛ kabayeɠei daalaogai, ti-nɛgi ɠa ga yaava anii. 
Ee, GALA, ti leve ga faa ɲɔu ɠɛ nuiti, è ti zo ɠana! Ti ɠoozu ɠisiɛi ɠɛ ga ti loo zaɓui. Ti ʋili ya ta-lɔ koloɠologiti maaʋele ma, nii gaa la luga. Mazɔlɔɔ ta wuzeɠezu è laalɔɠɔma. 
Kɛlɛ niiti kpein ti lɔɔɠuzu è ʋɔ bɛ, ta ɠoozunɛ è ʋɔ. Ta ɠoozunɛ eyɛsu ɠɔ, ɗa ɓaa ti maazu, ta ɠoozunɛ è ʋɔ, niiti è-laaseigi nɛai ti ʋɛ. 
Mazɔlɔɔ ɗɔun ɗa, Ɠɔoɠɔ GALAGI, ɗa tuya loo telebo nui ʋɛ. Ɗa ɓaa maazu ga ɗa-nuɓɔɠɔlai, eɠɛ kɔɔɠɔ zɛpɛgi. 
