﻿Guyeiti.
4.
Guye loo ɠundiɠii nɔnɔi ʋe. É loozu ga kɔnigiti. Davide ná-guyei. 
Siɛgi zu gè wooɠulazu la è ma, gòoɠaaʋote, GALAGI nii é ga nà-telebodai. Kidaaʋiligi zu, ɗa ìɲɔdɔɔzu. Zaalai la mà, è woilo nà-fali wooiti ma. 
Wɔi wo ga nuiti, wa yɛsu nà-lɛbiyai maaɓoozu, eyɛsu yeelɛ? Wa yɛsu faa ɲakai nɛɛzu ʋɛ, wo ɗa zɛɛi ɠaiziɛ, eyɛsu yeelɛ? 
À suɠwɛɛ ga Ɠɔoɠɔ GALAGI yiimazeɠeʋɛ ga zunu ɠila, nii é ga wooɠɛɠila nu tɔun bɛ, toɠa ɗa gòomɛni, siɛgi zu gè tolisu da. 
Wa yiiɠaawanana, à mina koto ɠɛ. À kisiɛi wo wa-ʋetei zu, wo maaɠɛ kpɔ. 
À zalaɠaiti kula, niiti ti zoloogai tɔgi ma, à ɓɔɠɔ ɠaliva Ɠɔoɠɔ GALAGI ma. 
Naati mɔinʋɛ, niiti ti gaazaɠagi wosu ga: «Mini ɠa gá-undaanɛɛi ʋaazu, é zeɠe ná?» Ee, Ɠɔoɠɔ GALAGI, è-ɠaazuʋɛ ma wozakalagi lo gi ʋa! 
Ɗa koozunɛɛi ʋuuzu zìimaʋɛ, é leʋe ta-molo leʋe ziɛgi zu ʋa, ta ta-lɔɔ niinɛi ʋu ziɛgi zu ʋa. 
Nà laana nɔ feya, nà ɲi ziilɛigi zu. Mazɔlɔɔ ɗa ɠila kpe, Ɠɔoɠɔ GALAGI, ɗa sèizu ziilɛigi zu. 
