﻿Zɔɓe.
35.
Eliyu kpɔɛzuɠulani ʋolu, é ɠɛ ma: 
«Zɔɓe, ɗa-ɠaama ɠa è su ɓaa, siɛgi zu è bosu la ga: ‹Ungo, tèlebogɛ GALA ba›? 
Mazɔlɔɔ ɗa ɠɛɛzu ma: ‹Lee ɠulanuma ɠa é naa zu è ʋɛ? Toɠa leeni ʋaa mà, ni gè la koto ɠɛɛni?› 
Nà ɠa gè è wooɠaaʋotesu, wa ɓɔga è-wɔɔlaiti ʋɔɔma. 
«Geeɠɔlɔgiti pɛtɛ dɛɛ. Tonaɓiingiti pɛtɛ, ta zɛlɛni è maazu poun! 
Ɗa faa ɲɔi ɠɛɛna, naa ɠa GALA kpɔlɔzu ɠale? Siɛgi zu è tɔ koloɠologi zuwɔɔlɔzu la, naa ɠa leeni ɠɛɛzu la? 
Ɗa ɠɛna ziaa ga pagɔ, leeni ɠa è feezu zea naazu? Leeni ɠa é sɔlɔɔsu è ya? 
Kɛlɛ ɗa-nu ɲɔulai è kɛɛzu, naa ɠa è-wɔɔla nuɓusɛi tanɔ ɓɔlɔ, ɗa-lelebodai ɠa ɓɔ è-wɔɔla nuɓusɛi tanigaa nɔ ʋa. 
«Wɔinzeɠemai a wɔɔlɔna, nuiti ta ɗa kpeei loo, ti ɓɔɠɔ maaloli bo zɛbɛsu nuiti ta-zeiungai laalɔɠɔma. 
Kɛlɛ nu nɔpɛ ge la ɠigaiziɛzu, é ʋa ɠɛ ma: ‹GALA ka mini, nii é kpɛ̀tɛni, nii é koozunɛ wuyeiti feezu zèa kua zaamai? 
Tɔ ɠa é de ɠalasu, é leʋe dɔɓɔ zuaiti ba, é ɠimalai ve de ʋɛ, é leʋe wɔniiti ba.› 
Naazu kpeei ɠa loozu, kɛlɛ GALA ge la gooɠaaʋote feezu, faa ɲɔu ɠɛ nuiti ta-wasogi maaʋele ma. 
Ungo, ta kpeei loozu wafuun, GALA ge la woiloga ma, é la Zɛbɛi-Pɛ-Maliɠii ɠaazu ga faa nɔpɛ. 
Toɠa è wooɠaaʋote ɠale, ɗɛi è ɠisiɛzu ga è la kaazu, ɗa maaɓɔunsu yeenɔpɛ, tɔɔzei è è-maavaiti daa bɛ. 
Tɔɔzei ná-ziiɠaawanai la dɛ losuʋɛ ɠɛɛni, kɛai eɠɛ ná-faa la kpaka fai zu, 
Zɔɓe ná-kpɔɛzuɠulai kpein ka nɔ ga fiilɛi, toɠa kpɔɛzuɠulai mɔinzu, é la kwɛɛ nii é bosu.» 
