﻿Zɔɓe.
28.
Adaʋɛti ta náʋɛ, ta ɗa walii ɠula ná, adaʋɛ tanigaa ta ná, ta ɗa zanugi gba ná. 
Kɔlui ɠa ɗa ɠula fufiligi zu, kɔtui ɠaawuungai ɠa kɔlu ɓɔigi a ɗa ɠula su. 
Zanu kula nuiti ta ɗa zeɠei wɔ, ti yei zooi wu, wozakalagi lɔ ná, ti kɔtuiti kula niiti ti lɔɔɠuai kpidii zu, kpidi ɓɔii zu. 
Ta ɗa zeɠei wɔ zooi wu, maaɠooza nuiti seizuʋɛ ʋa. Ʋɛ nu ɠɔɠɔlosu nɔpɛ ge la ná, zanu kula nuiti ti ɗa ɲiikpi. Ti zɛlɛni ada ɲakai maazu, ti maaɠoozaai zɔɔma nuɓusɛiti ba. 
Zooi nii daamianigi zɔlɔɔsu ba, naa ɠa valibosu kpomaʋɛti eɠɛ abui. 
Ná-kɔtuiti ta miná ʋɛ, kɔtu zɔngɔ ɓaagi daa ga safiil, naa zɔlɔɔsu ná, ta zanu fukɔi. 
Seeʋei la naama ʋelei ɠwɛɛ, sizigoi ɠaazuɠɛzɛi la dɛ ná ɠaani. 
Suai nii kpein daai ɓɔɠɔ la, naa tanɔpɛ ge la dɛ ziɛni ma, zalai la ɗa ga ziɛ ná. 
Nui ɠa zoosu é laalɛ fasa ɠɔtuiti golo vai wu, é gizeiti kpusɛ eyɛsu ti zeeli ti ma wuulaagiti ma. 
Toɠa fasa ɠɔtui zuwɔɔzu, gaazuɠɛzɛi ɠa zoo é ani ʋagɔi kpein ka su. 
Toɠa ziɛi luɠɔlo, naavoloiti ti lɔɔɠuai, é naati kula kɛlɛma. 
Kɛlɛ, nii é ga ɠimalai, mini ɠa nu a zoo é ka ná? Mini ɠa keleɠelegi zeini ná? 
Nui la sɔngɔi liegi ɠwɛɛ, nu la ka fulu nuiti ta-yooi ɠa. 
Palii ɓomaʋɛ ɠɛ ma: «É la sù.» Kpoloɗɛi ɠɛ ma: «É la pɔ̀ bɛ.» 
È la zooga è ʋa zanu kitei ve potogi zu, ɓaa mu, è walii ɠɔɠɔ kiloi ɠa è ʋa geya la. 
É la ʋokɔɠɔga zanugi ma, nii é ga Wofiil gelei, ɓaa kɔtu zɔngɔ ɓaagi nii é ga wonikese, ɓaa safiil gelei. 
È la zooga è ʋa zanugi ɓaa sanugi ti pokɔɠɔ ma. È la zooga è ʋa aniɲakai maavalibo da, nii é ga zanu kitei. 
Anɛɛ nu la kpɔzɔi ta sanu ʋɛɛlɛi ti ta-vaa woni. Ɠimalai zɔlɔɔ fai vizɔgɛ kɔtu zɔngɔ ɓaagi ʋa é ga pɛɛlegi. 
Kɔtu zɔngɔ ɓaagi é ga Etiyopi gelei, naa la ʋokɔɠɔga sɔngɔi ma. Zanu kitei la ʋokɔɠɔga sɔngɔi ma. 
Mini ɠa ɠimalai zeɠezu ná? Mini ɠa keleɠelegi zeini ná? 
Dɔɔɠuʋɛ nu vului kpein ba, dɔɔɠuʋɛ wɔniiti ba. 
Undaaʋili zeɠezaɠai ta saai ta ɠɛɛzu ma: «Gi ná-fai mɛnigɛ nɔ, é ɗa wo.» 
Mazɔlɔɔ GALA gila kpe ka é pelei ɠwɛɛ, nii é liizu pɔ bɛ. Ungo, GALA ka é seizuʋɛ ɠwɛɛ. 
Mazɔlɔɔ ná-wozaɠaai ɠa zeelizu eteai zu ná pɛ. Nii kpein é ɠɛɛzu geeɠɔlɔgi wu, toɠa kaazu. 
Siɛgi zu é fiilɛi wuɲɛgi ɠɔɠɔni da, é kpoloɗɛiti kɔɠɔ, 
é tonai ná-fai zeikpasu, é pelei ve mainmain ya, ta tona kpunɛ tugi, 
názu ɠa é ɠimalai ɠaani la, é kula kɛlɛma. É ɠimalai ma wuulaagi laani, é sumɔ, é fɛɠɛlɛfɛɠɛlɛ. 
Naa ʋolu, é ɠɛ nui ma: «Lua Maliɠii ʋa, è dɛbi, naa ɠa é ga ɠimala ɠitei! È ʋoluave faa ɲɔi ʋa, naa ɠa é ga keleɠelegi!» 
