﻿Zɔɓe.
27.
Zɔɓe ɓɔɠɔ liini ga luɠɔ ná-kpɔɛzuɠulai zu, é ɠɛ ma: 
«Gè ɠonaa Ɠɔoɠɔ GALAGI ma, nii é vulua, tɔungi é ɠɛlɛzu ga é mina nà-gaamai ɠula kɛlɛma, Zɛbɛi-Pɛ-Maliɠii, é zìi ɠoloɠologai, 
ni nɔ dɛ zɛnvui ɠa dɛ sù, GALA ná-zɛnvu viilɛi ɠɛ nɔ dɛ sòkpayeɠeiti su, 
dàkɔlɔgiti ti la telebotala vaa woga, nɛ̀gi la zɛɛ ɓɔɛ woga. 
Naama ɠisiɛi maaɠooza bà, gè ʋa ɠɛ wo ma, gaama ɠa wo ya! Eyɛsu zìi loo, gè la zeɠea nà-sɔle fai ʋolu. 
Gè sogɛ kpaan ga sìɛ ʋelei zɔlegɛ, gè la yeeɠulaa naa wu pɛ. Mazɔlɔɔ zìi la kpɔ̀lɔzu, é ʋilɛ nà-eteai ziɛ ʋelei ʋa. 
«Nii maanɛai é la faa ɲɔu ɠɛ nui ma, naa la sìli nui ma. Niiti ti laalɛɛzu bù, nii soloogai nu ɲɔiti ma, naa la naati ma. 
Lee ɠito ka a ɠɛ nu ɲɔi ʋɛ, siɛgi zu é leʋezu la ga, GALA ga zɛnvui zeɠena? 
GALA ka woilosu nɛi ná-kpee wooi ma, siɛgi zu kidaaʋiligi ʋaazu la, é zeeli ma? 
Toɠa zoo nɛi é Zɛbɛi-Pɛ-Maliɠii ɠɛ ga ná-ziilɛigi? Toɠa yɛ nɛi GALA faliiti daazeelizu ma yeenɔpɛ? 
«Nà wo ɠalasu ga wo GALA ná-zɛbɛi ɠwɛɛ, gè la Zɛbɛi-Pɛ-Maliɠii ná-faa ɓɛtɛaiti dɔɔɠuzu wo ʋa. 
Kɛlɛ wo pɛ, wo kaaʋɛ niina, lee vaa zu deɠɛmu, wo ɓesu ɓɔɠɔ ʋa, wo ɗa ʋilɛ faa ɲakai ʋolu? 
Wɛlɛ, naa ɠa GALA ge makɛgai faa ɲɔu ɠɛ nui luɠɔ, é sɔlɔɔsu, naa ɠa é ga sili masagi zɔlɔɔgi Zɛbɛi-Pɛ-Maliɠii ya. 
Ni a dounɠa zɔlɔɔna, ti wola mɔin, ta ɠɛ boɠa zɔkpɔi laawu, dounlointi ta ɠɛ pului laawu yeenɔpɛ. 
Niiti ta yɛ vulua, ɗɔfɔ zeeɓɛi ɠa li ga naati, ta-ʋoanzaiti ti la zooga ti ʋa ta-zaa wɔlɔi wo. 
Ni ta naavoloi ɠaalɛɛna ba eɠɛ fufiligi, ni ta seɠeiti gaalɛɛna ba eɠɛ palaʋalai, 
é ti ɠaalɛ ba deɠɛmu, telebo nui ɠa a ɓɔɠɔ maaɠili ga tiye, ná-waliiti gaa ɠa ɠwɛ sɔle nuiti ba. 
«Pɛlɛi é togai ma yɛɠɛlɛ nɔ ʋe, ada makɛ nu ɠota logai nɔ ɠa é kɛai. 
Toɠa laazu ná-kpɛtɛi zaama, ma ɠaaɓelagi ɠana ná. Siɛgi zu é ɠaazuzeɠezu ma la, é la mɔ ani nɔpɛ kaa. 
Kidaaʋiligi ɠa maaɓɔle, eɠɛ ziɛ wolai, tɔngɔlɔ fiilɛi ɠa seɠe kua zaamai. 
Folo ɠulazu ʋele viilɛi ɠa seɠe, é lii la, toɠa tɔɔɠula ga zeeɠaaɓaai, é kula ʋɛ é ná. 
Ta mɛɛinti pilisu daalɔɠɔma, ti la maawɔinɠaazu. Kɛni é ɓizɛ, é ʋa ɠula ti ya. 
Ti ɗa yealoɠa ma, tɔɔzei é ɠoloɠologa, ti ɗa ɲɛɛɠula su, seizuʋɛ ɓɔɠɔi.» 
