﻿Zɔɓe.
17.
«Zɛ̀nvu vai ɠaa na ɓaa, sìi ma voloiti ta ɓe, kabayeɠei ɠa màaɓɔunsu. 
Ɲɛɛɠulasu nuiti ti la màaɠoolizu ɓaa? Ta-laazuɠɔlii la vaazu bu, gè ʋa ɲiimɛnii wo. 
Ee, GALA, ɗa ɓɔɠɔi ɠɛ bɛ̀ ga maalobo nui! É ɠula è ʋolu, ɓɛ ɠa é minazeɠezu ga nà-faa? 
Gaamazu, è ti yiilaaɠuluga kidafaawui luɠɔ, è la vaa bu, ti ʋa zobo sɔlɔɔ. 
Zɔi é bɔɔlaiti kwɛɛzu ga ti naati zeavoo, toɠa ná-dointi dɔɔzu kpɔlɔi zu. 
«GALA ge kɛ̀ɛni ga nii ɛsɛ pɛ ge ɲɛɛɠulazu su, ti ɗa laaɗɛi ʋu gàazuʋɛ. 
Gàazuɠɛzɛiti ti la mɔ volozu, ti zaa su ga ziizoolɛi, kpùsɛi kpein ge ɠɛa nɔ eɠɛ niini. 
Sɔle nuiti daavɔɔʋɛ ga nà-taɓai vaa, ta sɔbalala nui ɠa wuzeɠezu nu ɲɔi laalɔɠɔma. 
Anɛɛ naa ʋe, telebo nui ɠaaɓa siɛ ʋelei ma, nui zeeiti ɲadegai, naa ta ɓɔ ná-gaaɓaai ʋa. 
Kɛlɛ wɔun bɔ̀ɔlaiti, à ʋa, wo pɛ à ɠale ma, wo ʋa, gè la ɠima nu ɠila kpalaa kaazu wo zaama! 
«Nà-foloiti ti leʋega, nà-faazeikpasuiti ti ʋua ya, zìima vaiti ti la mɔ zolooni. 
Ta ɠɛɛzu ma: ‹Kpidii ɠa ga foloi, wozakalagi maaɓuɠa,› tama kpidii ɠa dɛ é ná. 
Kɛlɛ leeni ɠa niina gè ɠitosu ba? Nà zeizu zɔlɔɔ gɔvɛalaazu, kpidi yooi zu ɠa gè dàazuʋɛ ɓɛtɛzu ná. 
Gè ɓainni kabayeɠei ma, gè ɠɛ ma: ‹Ɗa ɠa è ga kɛ̀ɛ!› Gè ɠɛ duulai ma: ‹Wa ga dèe ta nà-seelaiti!› 
Mini ɠa deɠɛmu nà-kitogi ná? Ɓɛ ɠa a zoo é nà-kitogi zuzo? 
Gá yeizu ga tɔ ʋɔɔma gɔvɛalaazu, gi felegɔ gá loozu fufiligi zu.» 
