﻿Zɔɓe.
5.
«Wooɠula lɛɛ, è pɛtɛ ni nu ɠa è wooɠaaʋote. Geezuɠeela ɲadegaiti su, ɓɛgele ɠa ɗa wooɠula ma? 
Mazɔlɔɔ ziiɠulagi ɠa a ɗa ɠimalala nui ʋa, ziiɠaawanai ɠa ɗa faaɠaaɠalala nui undaaʋili. 
Gaamazu, gè ɠimalala nui ɠaani, sape ɗa ziɛ, su la ɠɛni ɠoozani, gè niima ɠotoi looni ná-pɛlɛyeɠei ma: 
‹Ná-dointi ti mina ʋoluzeizu nɔpɛ sɔlɔɔ, ta ti ʋeelalana tukpɔɠaaleʋezuʋɛ, nu mina zɔlɔɔ é ʋa ti maavaawo! 
Nii a faza, naama lɔnɔgi ɠɛ ga taɠiligaa tɔnɔ, ti li, ti so, anɛɛ ni ɠaingiti ta ná! Unsuɲɔu nuiti ti ʋa, ti loo zeaɠɔligiti su!› 
«Maanɔɠɔi la ʋɔnɔga é ʋa ɠula fufiligi zu, kpɔlɔi la wuzeɠea é ʋa ɠula pɔlɔi ʋa. 
Mazɔlɔɔ nui ɠa zɔlɔɔsu kpɔlɔi zɔlɔɔ fai ma, eɠɛʋelei abuɓeɓelai a ɗa wuzeɠe koʋe fai ma la. 
«Ni nà ɠɛni de, GALA nɔ ɠa nà la ʋoluzei ba, ungo, GALA ka nà la nà-faiti daazeeli ma. 
Niiti é ti ɠɛɛzu, naati ta ga faa wolaiti, nu la ti ɠaaɠa, nu la zooga è ʋa ná-laavɔɔ vaiti gaalu. 
Tɔ ɠa a ɗa tonai ʋu eteai zu ná pɛ, é dɔɓɔi kpein kɔ ga ziɛi. 
Niiti ti maayeiɗai, toɠa naati buzeɠe, ti ɠaaɠooza, niiti ti yiizoolɛai, toɠa naati unmɔɔ, é ti ɠula. 
Toɠa ɗa naati ta-vaazeikpasuiti suɠoloɠolo, niiti ti ga keleɠele nu ɲɔiti, ti-yeeiti ti la zooga ti ʋa ɓɔ ti ʋa, ti ʋa li luɠɔma. 
Toɠa ɗa ɠima nuiti so ga balii, nii é ga ta-ɠeleɠele ɲɔi, ta-lɛnɛ ɲɔiti ti la faa ʋaa. 
Ta ɗa ziɠa kpidii ʋa folo ɓekpegi, ti ɗa yeeʋɛɛ mɛmɛ folo gaalɔgai. 
GALA ka ɗa bala nui ɠula ti-laaʋɛ ma woɠa zɔkpɔi laawu, toɠa ɗa maawɔin nui ɠizo, é kula zobobɛ nuiti zea. 
Kito ka maawɔin nui ʋɛ, ta toɠa ɗa faa ɲɔu ɠɛ nuiti pɛ daaɠulu. 
«Naa ɠa é ba deɠɛmu, undaanɛ nui ɠa ga naa, zɔi GALA ge maaɠolozu. Mina ɠɛlɛ Zɛbɛi-Pɛ-Maliɠii ná-maaɠoloi ʋa. 
Mazɔlɔɔ GALA ka nu ɓɔlɔ, é è ɠɛdɛ ɓalaa. Ni a nu maawanana, tɔ ɓɔɠɔi ɠa a kpe. 
Kidaaʋili seizu lɔzita zu, toɠa è ɠula ti zu, dɔfelasiɛi zu, faa ɲɔu la zeelia è ma. 
Pului ma ziɛgi zu, toɠa è ɠizo saai ma, kɔɔi ɓɔi ʋa, toɠa è-yɛnvui makɛ. 
Ɗa lɔɔɠuzu zɔlɔɔ nu nɛgi ná-kpakɔi ʋa, è la lua faa zuɠoloɠologi ʋa é ʋaazu. 
Ɗa ɲɛɛɠula faa zuɠoloɠologi ta pului zu, è la luaa dɔɓɔ zuaiti ba. 
Mazɔlɔɔ minazeɠe ka ɠɛ wo yɔɠɔzu wa dɔɓɔzu ɠɔtuiti, ta ziilɛigi ɠa ɠɛ wo yɔɠɔzu wa dɔɓɔ zuaiti. 
Ziilɛigi ɠa ɠɛ ɗa-ʋɛlɛi wu ná pɛ, siɛgi zu è wɛlɛzu la ɗa-logani ɓulugiti ma sasai zu, gaa la ʋalaga ta ʋa. 
Ɗa pɛtɛ ga ɗa-ʋɛlɛyeɠei ɠaa ɠa wɔɔlɔ, è-mavofodaiti ti ʋɔnɔ eɠɛ dɔɓɔzu lufaiti. 
Ɗa yei kabai zu ga pɔlɔzaɠadai, eɠɛ molo ɠili wolai nii daavegai. 
Wɛlɛ, naa ɠa gi ɠidaai bu gola, tɔ ɠana. Woilo niima vaiti ma, è ɗɔnɔ zɔlɔɔ ti zu.» 
