﻿Zɔɓe.
4.
Teman nui Elifaze kpɔɛi zeɠeni, é ɠɛ ma: 
«Nu ɠa zoo nɛi é woo ɲɛ gila bo è ma? È wola iɲɔteʋeʋɛ! Kɛlɛ ɓɛ ɠa zoo é maaɠɛ kpɔ? 
Wɛlɛ, ɗa ɠa è ɠɛa nu mɔinmɔin kalasu, è ti iɲɔdɔ, tɛigiti ti-yee zuɓɔlɔni. 
È ɓɔɛ wooiti ti ɠɛni naama nui wuzeɠezu nii é ɠɛni loozu, è ɗa naati sɛbɛlɔ, niiti ti-ɲiibiiti suɓɔlɔai. 
Niizu ɗa ɠa è iɲɔ ge leʋea siɛgi zu maanɔɠɔi è ma la! Tɛi ɗa ɠa pilɛgai è ʋa, è ɠɛa unga wuulee! 
Ɗa-ɠidaaleʋei è bo ga GALA ma, naa laade é ʋa ɠɛ ga ɗa-ladalai ma ungi ɓaa? Ɗa-lelebodai la ga ɗa-ɠitogi ɓaa? 
Ɠisiɛ lɛɛ, sɔbalala nui ɓɛgele ɠa undaaʋiliga? Sɔle nui ɓɛɛni ka ti zuɠoloɠologa? 
Ʋelegi gè ɠidaa bu la, zɔiti ti telebotalai ta nimizai vazasu, ta ɗa ti-ɠaawaai ɠula. 
GALA daa viilɛi ɠa ɗa ti undaaʋili, toɠa ɗa ti ɠala ná-ziiɠaawanai zu. 
GALA ka ɗa zalaiti daaɠulu, ta ɠɛna zikɔa, é zala ɓokpagiti ɲiigaiti galeɠale. 
Daamiani balagi ɠa ɗa zalai ʋaa, zala yiʋoiti ti vaza. 
«Wooi ta zeelini mà dɔɔɠuzu, gòiyeɠe ma woo goi mɛnini, é ɗa wo vaa, 
segi zu, kpidii, siɛgi zu kisiɛiti supuai la, siɛgi zu ɲiimɛni wolai leʋeai la ga nuɓusɛiti. 
Gè ɓalini ga duai, kàeiti su ɠɛ yɔɔɠɛ. 
Fiilɛi ta ma zii ʋuuni gàazuʋɛ, é kɔɔlɛ ɓooi yei ga ze. 
Nui ta ɠɛni loni gàazu, gè la ɠɛni baaɠulaba ɠwɛɛ, kulakɛlɛmai naa ɠɛni gàazu. Gè woo goi ta mɛnini, é ɗa wo vaa, é ɠɛ ma: 
‹Nuɓusɛi ɠa lelebo nɛi ɓaa GALA gaazu? Nui ɠa zoo nɛi é ɲade Kpɛtɛ Nui ɠaazu?› 
Ni GALA ge la zooga é ʋa ʋoluzei tɔ ɓɔɠɔi ná-botiɠɛ nuiti ba, ni é kaka fai ɠaa ná-geezuɠeelaiti su, 
toɠa zoo ɠale ʋoluzeizu nuɓusɛiti ba, ti ɓɛtɛai nɔ ga penɛi, ti ga fufiligi, nu a kpɔnɛkɛlɛ eɠɛ ɓaɠaɓaɠai. 
É zo sobui ma, é ʋa li kpɔkɔi ʋɔ, ti ɠɛa ga fufiligi, ti ɲɛɛlɛ eyɛsu ɠɔ, nu ɠi ge la loa ti zu. 
Ti-yɛnvui ma ɠalui leʋea ga, ti za, ti la ɠimalai zɔlɔɔni.» 
