﻿Zɔɓe.
3.
Naa ʋoluma, Zɔɓe laalaoni, é sɔlɔɔ foloi ɠoto. 
É kpɔɛi lɔɔzeini, é ɠɛ ma: 
«Foloi naa ɠoloɠolo, yeei gè zɔlɔɔni da, ta kpidii nii é ɠɛni ma: ‹Zunu loun ma wo ge zeɠea!› 
Foloi naa, é ɠɛ ga kuai. GALA nii é geezuʋɛ, é mina yiizoolɛ la, wozakala ge mina volo su. 
Kuai ta kpidi ɓɔii ti seɠe ga tɔnɔ, tonaɓiingiti ti yɛ zɛlɛni maazu, foloi ma lɔmɔzɔɔgi maalua! 
Kpidii naa ma, é ɠɛ ga kpidii nii tɛigai é leʋe ti pɛ ba! Gaa mina lu konagi ma voloiti saama, é mina lɔ alugi ná-gaalugiti su. 
Ungo, kpidii naa zuɲakai yɛ de, koozunɛ woo mina ɠɛ su! 
Ungo, naama ɓidii maayo ge zeɠe nui naati bɛ ta ɗa foloiti koto, ta niiti ti ziɛ wu zua maayikiai lolisu! 
Kuai ná-sobu zomideɠaiti maalɔɔɠu, é ɠito wozakalagi ʋa, kɛlɛ naa mina ʋa pɔ, é mina geelaalaosuʋɛ ɠaazuɠɔlɔgiti buuɠa! 
Mazɔlɔɔ é la naama ɠogi laaɠuluni, nii é sɔ̀lɔɔni, ɓaa é ʋa pele leʋe nà-maanɔɠɔi luɠɔ! 
«Lee vaa zu gè la zaani aisa gè ʋa zɔlɔɔ? Lee vaa zu gè la zaani sɔ̀lɔɔsuʋɛ? 
Lee vaa zu gè nu ɲiibi felegɔiti sɔlɔɔgai, ti yeezei bù, ta dèe ɲiimiiti zɛ̀gai ti ɓɔlezu, gè ɠula su? 
Niizu nà la ɠɛ niina laani dɔin, gè ɠɛ ɲiizu, gè ɗa looɠo 
ga masagiti ta etea nu wolaiti, niiti ti ɠizɛsu aniiti togai ʋolu, niiti ti ɠoloɠologa ɠɛni de, 
ta kundiɠiiti, zanugi ti ya, ti ta-ʋɛlɛiti daavesu ga walii. 
Ɓaa gè mina ɠula etea, eɠɛ doin saai sɔlɔɔsuʋɛ, ɓaa eɠɛ doungoiti niiti ti la ɠaazulaani folo ma. 
Kabai zu, faa ɲɔu nuiti ta looɠo niina ga zɔiti kpɔlɔa, niiti ti ɓɔlɔai, ta zoo ti lago looɠo. 
Kasoɠa nuiti ziilɛiʋɛ ná, ti la mɔ ta-wɛlɛma nuiti daawoo ɠila kpalaa mɛnisu. 
Ɓolomadɔɠɔiti ta seizumaanɛgiti ta ná, duɔi viega, é ɠula maliɠii ya. 
Lee vaa zu wozakalagi veezu maanɔɠɔ nui ya, ta zɛnvui veezu naati zea, niiti ti ziiɓɔlɔi zu? 
Ti ɗa saai maaɓɔun, naa ma ge la ʋaazu, ti ɗa gaiziɛ é leʋe naavoloi ʋa. 
A la ɠɛ ti ʋɛ ga undaanɛ vaa, ti ɠoozunɛ gola ni ta la ta-ɠabayeɠeiti sɔlɔɔ. 
Nà ga zunui nii é la liizu ɠwɛɛ, tama GALA ge kàtagɛ eɠɛ nà ɠɛ sasa ʋolu. 
Kpàla gooiti ti ɠɛa ga nà-daamianigi ʋotogi. Nà-kpee wooi nà-taɓai zu, naati kɛɛʋɛ eɠɛ ziɛi é yeizu. 
Nii dùai ba, naa ɠa é sɔ̀lɔɔgai. Nii gè inɛinɛni ba, naa ɠa seeliai mà. 
Gè la gaanɛɛi zu, ɓaa ziilɛigi, ɓaa dooɠogi, kɛlɛ kpɔlɔi nɔ ɠa gè daawu yeenɔpɛ.» 
