﻿Ɛsetɛɛl.
7.
Masagiti ta Aman ti zeelini masa anzai Ɛsetɛɛl ʋɔ bɛ ga ti fɛtii ɠula ta tiye. 
Foloi velesiɛi naa, ti ɠɛai ma dɔɔi ɓɔlezu, masagi ɠɛni mɔnɔ Ɛsetɛɛl ma: «È ɓɛdɛma vai ɠa ga leeni? Leeni ɠa è pɔ ga é ɠɛ è ʋɛ? Anɛɛ ɓalaa toɠa ɠɛɛzu ga nà-masadai ɠilazuʋɛ pɛ, toɠa ve è ya.» 
Masa anzai Ɛsetɛɛl masagi wooɠaaʋoteni, é ɠɛ ma: «Ni gè zaala zɔlɔɔga masagi ɠaazu, ta è ɗa-nuɓɔɠɔlai makɛgɛ bɛ̀, soma è gi-yɛnvuiti kizo, gá nà-nuɓusɛiti, naa ɠa gè pɔ, kpɛ̀dɛma vai ɠana gè ɠɛɛzu è kɛ bɛ̀. 
Mazɔlɔɔ gá nà-nuɓusɛiti gi ʋɔdiʋɛ ga ti gi ɠɔdaaleʋe, ti gi ʋa, ti gi zuwuɠaaleʋe. Ni ti gi ʋɔdini nɔ ga gi ɠɛ ga duɔiti, naazu gè la ɓena faa wo è ma, mazɔlɔɔ naazu gá-maanɔɠɔi la ɠɛa ga faa nii nu a masagi ɓɔlɔ ma vaa zu.» 
Masagi ɓɔɛni naazu Ɛsetɛɛl ʋɔ, é ɠɛ ma: «Ɓɛ ɠa é naa ɠɛɠala ɠisiɛi wogai? Mini ɠa é ná?» 
Ɛsetɛɛl gooɠaaʋoteni, é ɠɛ ma: «Gi-ɓɔɛɲɔɠɔi ta gi zili nui ɠa ga Aman nu ɲɔi tɛi.» Dualuagi lɔɔni Aman zu gaamanɔ masagi ta Ɛsetɛɛl ɠaazu. 
Masagi zeɠeni ga ziiɠaawanai fɛti laamii wosuʋɛ, é li masa pɛlɛi ma ɠoi wolai zu. Aman gaaɠaani ga masagi ɓega ga saa vai leve yiimaʋɛ, é yɛni pɛlɛi wu, é ɗa masagi anzai Ɛsetɛɛl maanɛɛnɛ ga naa zɛnvui ɠizo. 
Masagi zeɠeai ma kpelei zu, é ɠale ma fɛti laamii wo pɛlɛi wu, é Aman ɠaani laani kpɔkpɔ koozagi zu, ʋɛ masagi anzai Ɛsetɛɛl zakpa maalega ɠɛni de ná. Masagi zɛba é ɓain, é ɠɛ ma: «Nu laali nii ɠa pɔ ga é ʋu ànzai ma gàazu, pɛlɛi nii wu ɓaa?» Naama wooi ɓeni nɔ ga ɠula masagi la-o, ná-botiɠɛ nuiti ti ʋaa, ti Aman ɠaazuʋɛ ɠili. 
Ti zaama, zɔi daa ɠɛni ga Ɠaaleɓona, naa ɠɛni masagi ma: «Masagi, gului ɠa ʋɛ nii Aman kpɛtɛai ga Maledosé zɛlɛ ba, zunui nii kpɔɛ wooi ɠɛai ga zaɓui masagi yɛnvui yɛ zea, ma gului ɠa loni Aman ná-pɛlɛlaʋɛ, koozaʋɛ ga mɛtɛlɛ ʋuufele maazu lɔɔlu (25).» Masagi ɠɛni ti ma: «À Aman zɛlɛ gului naa ʋa.» 
Aman zɛlɛni gului naa ʋa, nii é kpɛtɛni Maledosé laalɔɠɔma. Naa ɠɛai ma, masagi ná-ziiɠaawana ɠaayeini. 
