﻿Ɛsetɛɛl.
5.
Folo saʋagɔ zugi ɓegai ma, Ɛsetɛɛl ɓɔɠɔ maaɠilini ga ná-masa seɠeiti, é li masagi ná-koi zaamaʋɛ, é ɠaaʋote masa pɛlɛi ma. Masagi ɠɛni zeini ná-masa kpɔkpɔgi ɠa masa pɛlɛi wu, gaaʋotegai pɛlɛlaʋɛ ma. 
É masa anzai Ɛsetɛɛl ɠaai ma loni koi zaamaʋɛ, é yeezeini naa wu ga nuɓɔɠɔlai, ná-zanu tukpɔi é ɠɛni zoni zea, é naa leteni Ɛsetɛɛl ma. Naa maaɓuɠani, é yeevɔɔɠu tukpɔi zokpai ʋa. 
Masagi gaazaɠani, é ɠɛ ma: «Lee ɠa kɛai ga ɗe, masa anzai Ɛsetɛɛl? Ɓɛgele ɠa è pɔ é ɠɛ è ʋɛ? Anɛɛ ɓalaa toɠa ɠɛɛzu ga nà-masadai ɠilazuʋɛ pɛ, toɠa ve è ya.» 
Ɛsetɛɛl gooɠaaʋoteni, é ɠɛ ma: «Masagi, ni ɗa vaana bu, nà pɔ za wo ʋa wa Aman fɛti laamii wosuʋɛ, nii gè kpɛtɛai è ʋɛ.» 
Masagi wooleʋeni ga Aman ʋa fala, ti li Ɛsetɛɛl ná-toligi zu. Masagi ta Aman ti liini fɛti ɠulazuʋɛ, nii Ɛsetɛɛl kɛʋele ɓɛtɛni. 
Ti ɠɛai ma dɔɔi ɓɔlezu, masagi ɠɛni Ɛsetɛɛl ma: «È ɓɛdɛma vai ɠa ga leeni? Leeni ɠa è pɔ ga é ɠɛ è ʋɛ? Anɛɛ ɓalaa toɠa ɠɛɛzu ga nà-masadai ɠilazuʋɛ pɛ, toɠa ve è ya.» 
Ɛsetɛɛl ɠɛni ma: «Kpɛ̀dɛma vai nii é ná, nii gè suvalizu, naa ɠa ga, 
ni gè zaala zɔlɔɔga masagi ɠaazu, ni ɗa pɔ ga è wɔ̀inma vaiti kɛ, nà pɔ wo ʋa lina wa Aman fɛti ɠulazuʋɛ nii gè kpɛtɛai è ʋɛ. Naazu nà è wooɠaaʋote niina.» 
Naama voloi Aman ɠaleni ma ga koozunɛ wolai. Kɛlɛ teʋesuʋɛ masagi ná-koii laaʋɛ, é Maledosé ɠaani ná, naa la wuzeɠeni bɛ, é la luani ba. Ziiɠaawanai lɛɛni Aman ɠɔbu gola Maledosé laalɔɠɔma. 
Kɛlɛ é ɓɔɠɔ zuzoni, é li ná-koizu, é bɔɔlaiti ta anzai Zelɛse lolini miná. 
É ɓɔɛni ti ʋɔ é lo ná-kpɛtɛi ʋa, ta ná-doun mɔinmɔingiti, naa ʋɛɛ unfema wolai ʋa masagi feeni bɛ, tosu mɔungi vee vai zu bɛ botiɠɛ nu wolaiti pɛ ta kundiɠiiti pɛ saama. 
É ɠɛni ti ma mɔnɔ: «Nà ɠila nɔ ɠa ʋolu masagi anzai Ɛsetɛɛl toligai ga gè ʋilɛ masagi ʋolu, gi li fɛti ɠulazuʋɛ nii é kɛʋele ɓɛtɛai za. Lina mɔnɔ gi loligɛ gá masagi. 
Kɛlɛ naa tanɔpɛ ge la ga kulanuma bɛ̀, ni nà dɛ niima Zuifui Maledosé tɛi kaazu botii zu masa pɛlɛi laaʋɛ.» 
Anzai Zelɛse ta Aman bɔɔlaiti pɛ ti ɠɛni ma: «Bo ti gului ɓɛtɛ gaaɠooza ga mɛtɛlɛ ʋuufelegɔ maazu lɔɔlugɔ (25), lina sobu è bo masagi ma ti Maledosé zɛlɛ ba, naazu ɗa zoo liizu fɛti ɠulazuʋɛ ga koozunɛ, wa masagi.» Naama wooi nɛɛni Aman ʋɛ, é boni ga ti gului ɓɛtɛ. 
