﻿Ɛsetɛɛl.
2.
Naama vaiti poluma, masagi ná-ziiɠaawana ɠaayeini. É ɠisiɛni naa zu nii Vasiti kɛɛni, ta devei nii é zeɠeni daalɔɠɔma. 
Zunui niiti ti ɠɛni botii ɠɛɛzu bɛ, naati ti ɠɛni ma: «Maanɛɛʋɛ ga ti anzalopoiti gaiziɛ è ʋɛ, ti ʋagai, ti la dɛ zunu vaa ɠwɛɛ. 
Masagi, yeelona mu botiɠɛ nui tanigaa ʋa ɗa-masa zooi ma you zɛʋɛi pɛ su, ti anzalopoiti gaalɛ ba, niiti ti ʋagai, ti la dɛ zunu vaa ɠwɛɛ. Ti ʋa ga tiye Suze taa wolai zu, anzanuiti makɛ ʋɛlɛi wu, ti ti ɠaliva Yegai ma, zunu zɛɛɠagai nii a ɗa wɛlɛ anzaiti ma. Toɠa pa gulɔiti fe ti ya. 
Anzalopoi nii nɔpɛ é ʋasu è ɠaazu, ɗa yiimazeɠe ga naa, é ɠɛ ga masa anzai Vasiti ʋotogi zu.» Naama wooi nɛɛni masagi ʋɛ, é naa ɠɛ. 
Zuifui gila ge ɠɛni zeini Suze taa wolai zu, daaseigi ga Maledosé. É ɠɛni ga Yayiil ná-doun zunui, Simeyi ta Kise ti-mavofodai zu, Ɓɛnzamɛn ná-bolodamaiti saama. 
Ná-pɛlɛyeɠei yɛni zɔɔma nuiti ba, niiti Ɓaɓilɔne masagi Neɓukadenɛzaal ti ɠulani Zeluzalɛme ʋa, é li ga tiye ʋɔɔma ta Zuda masagi Yekonia. 
Maledosé naa ɠa é ɠɛni kɛkɛ loin Ɠadasa makɛ zu, nii ti ɠɛni ɠɛɛzu ma Ɛsetɛɛl. Naa ɠɛni ga podoin, gola ʋani. Kɛɛɠɛni ta dee ti zaai ma, Maledosé ɠa é seɠeni, é kula su. 
Siɛgi zu masagi ná-devei vazani la, ti anzalopo mɔinmɔin gaalɛɛni ba Suze taa wolai zu, ti ti ɠaliva Yegai ma, Ɛsetɛɛl ɓalaa yɛni ti zaama, ti ʋa ga tiye masagi ná-koizuʋɛ, Yegai nii a ɗa wɛlɛ anzaiti ma, naa ɗa wɛlɛ ti ma. 
Anzanu loungoi ʋani gaazu, é ɛnɛkɛ. É pa gulɔiti ta ɠɔnɔgiti feeni zea ga suvilɛ, é botiɠɛ anzanu loungo lɔfela ve zea, niiti é ti zeɠeni masagi ná-pɛlɛi wu wotiɠɛ anzanu loungoiti saama. É daazu ʋagɔ ve ti ya ta ná-botiɠɛ anzanu loungoiti, anzanuiti makɛ ʋɛlɛi wu. 
Ɛsetɛɛl la ɠɛni kɛɛni é ʋa ma zii ta ná-nuɓusɛiti dɛɛ, mazɔlɔɔ Maledosé pele leʋeni tuɠɔ ga é ʋa bo. 
Folo-o-folo Maledosé ɠɛni ziɛziɛsu anzaiti makɛ ʋɛlɛi laaʋɛ, nii a kɛ é ɠɛ kwɛɛ ni Ɛsetɛɛl ɠɛdɛgɛ, ta é faiti dii ʋelei ɠa. 
Anzalopoi ɠilagilagi pɛ ge ɠɛni kɛɛzu ga kona gila, é ʋa li masagi Zɛɛlesɛse ʋɔ bɛ, eɠɛʋelei anzanuiti ta-vaazeikpasui ɠɛni la. Mazɔlɔɔ ma nu ɠɛni alu dɔzita mɔungi ɠɛɛzu, é ɗa miile gulɔi ziɛ ɓɔɠɔ ma, alu dɔzitai mɔtai é naa ɠɛ, é ɗa gulɔ maku nɛɛnɛgiti ta anzaiti ta-ʋa gulɔi zɔiti siɛ ɓɔɠɔ ma. 
Siɛgi zu anzanu loungoi li yeeɠɛɠalai a zeelina la masagi ʋɔ bɛ, nii nɔpɛ é maavalizu, naa ɠa ti ɠɛni feezu zea, é zeɠe la anzaiti makɛ ʋɛlɛi wu, é lii la masagi ná-pɛlɛi wu. 
Ma nu ɠɛni liizu ná ga kpɔkɔi, poluma zobui ti lii la anzanu makɛ ʋɛlɛi taɠili bu, Sasegaze ɗa wɛlɛ ti ma, zunu zɛɛɠagai nii é ɠɛni masagi anzaiti makɛsu, niiti ti la vuluni ga zɔiti kɛʋele. É la mɔ ɠɛni ɠalesu ma masagi ʋɔ bɛ, kɛni ni masagi ɓɛdɛ ɠa ʋilɛna ba, é toli ga daaseigi. 
Yeeta, Maledosé kɛkɛ Aɓiyayile ná-doun anzanui Ɛsetɛɛl, nii Maledosé kulani su, naa ná-kui zeelini ga é li masagi ʋɔ bɛ. É la ɠɛni ani ɠili nɔpɛ maavalini, kɛni nii nɔ Yegai tɛnɛni da, masagi ná-zunu zɛɛɠagai nii é ɠɛni anzaiti makɛsu. Ɛsetɛɛl ɠɛni nuiti pɛ ɛnɛkɛsu, niiti ti ɠɛni pɛtɛsu. 
Ti ʋaani, ti Ɛsetɛɛl zeɠe, ti lii la masagi Zɛɛlesɛse ʋɔ bɛ, masa pɛlɛi wu. Naa ɠɛɛni masagi ná-kona dɔfelasiɛi ma alu puugɔi ma, alugi nii daa ga Teɓɛte. 
Masagi Ɛsetɛɛl nɛɛni ʋɛ, é leʋe zɔɔma anzanui kpein ba, naa ɛnɛkɛni, maayo ge ɠɛ ɓalaa é leʋe anzalopoi zɔiti kpein ba, ti la dɛ zunu vaa ɠwɛɛ. É masa bɔɔlɔgi lɔɔni Ɛsetɛɛl unma, é sei Vasiti ʋotogi zu. 
Ɛsetɛɛl maaʋele ma, é fɛti wolai ɠɛʋele ɓɛtɛni ná-kundiɠiiti bɛ ta ná-botiɠɛ nu wolaiti bɛ. Naa ʋoluma é ta ɠulani mului la nuiti pɛ bɛ ti zou zɛʋɛ wolaiti su, é ɗa faaɓɔɠɔi ɠɛ ʋelei masa ka kɛɛ la. 
Ti anzalopoiti gaalɛɛni ba seizu velesiɛi zu, naama ziɛgi zu Maledosé ɠɛni botii ɠɛɛzu masagi ná-pɛlɛi wu. 
Ɛsetɛɛl la ɠɛni kɛɛni pɛ é ʋa ná-pɛlɛyeɠei zeɠezuʋɛ lɛ ta ma zii, ʋelei nɔ Maledosé boni la ma. É ɠoloni naa ná-deveiti bu, eɠɛʋelei é ɠɛni kɛɛzu la, kɛai ma naa ʋɔ bɛ dɛ. 
Naama ziɛgi zu Maledosé ɠɛai ma ná-botii ɠɛɛzu masa pɛlɛi wu, zunu zɛɛɠaga felegɔ ɠɛni ná, ti-laa ga Ɓigitan ta Telɛse, ti ga masagi ná-pɛlɛla makɛ nuiti, ti yiiɠaawanani masagi Zɛɛlesɛse ma, ti ɠɛni pɔ ga ti paa. 
Maledosé faa ɠwɛɛni é ʋilɛ naa ʋa, é bo masagi anzai Ɛsetɛɛl ma, naa ɓalaa bo masagi ma ga Maledosé lɔɠɔi. 
Ti faiti buuɓɛai ma, ti kaani ga nii bogai gaamai ʋe, ti zunu felegɔi naati sɛlɛni gului ʋa, ti za, ti ma vai zɛʋɛ masagi ná-faa ɓii makɛ zɛʋɛi zu. 
