﻿Neɠemi.
3.
Zalaɠa ɠula ɠundiɠi wolai Eliasiɓe wuzeɠeni ta bɔɔla zalaɠa ɠula nui zɔiti, ti Baala Siɠidaʋɛ lo ʋolu. Ti naa veeni GALA bɛ, ti kpogiti too da, naa ʋoluma ti liini ga siɠigi ɓɛtɛa ʋolu, ti ɗa fe GALA bɛ, eyɛsu ti zeeli Mea Ziɠigi ma, ta Ɠananeyɛle Ziɠigi. 
Zeliko nuiti ti ɠɛni botii ɠɛɛzu zalaɠa ɠula nuiti koba, naa ʋolu Imili ná-doun zunui Zakuul ɠa é ɠɛni naati koba ʋepema ɠila. 
Senaa mavofodaiti ti Kale Ziɠidaʋɛ loni ʋolu. Ti maalɛɛ, ti kpogiti pilɛ da, ta sɔɠɔgiti, naa ʋɛɛ ma wulu zɔkpɔiti ba. 
Nui niiti ka ti ɠɛni botii ɠɛɛzu ti ɠoba: Akɔse ná-dounloin Melemɔte, Ilii ná-doun zunui ɠɛni de, naa ʋoluma Mesezaɓɛɛle ná-dounloin Mesulame, nii é ɠɛni ga Ɓelekia ná-doun zunui, naa ʋolu Ɓaana ná-doun zunui Sadɔke. 
Naati kobaʋɛ, zɔiti ti ɠɛni botii ɠɛɛzu ná, naa ɠɛni ga Tekoa nuiti, kɛlɛ ta-nu wolaiti ti la ɠɛni kɛɛni, ti ʋa boti ɠɛ ta-wotiɠɛ ɠundiɠiiti zeewu. 
Paseya ná-doun zunui Yoyada, ta Ɓezodia ná-doun zunui Mesulame ɠa ti Siɠida Wɔlɔmai ɓɛtɛni ʋolu. Ti maalɛɛni, ti kpogiti pilɛ da, ta sɔɠɔgiti, naa ʋɛɛ ma wulu zɔkpɔiti ba. 
Zɔiti ti ɠɛni botii ɠɛɛzu naati koba, ti ɠɛni ga niiti: Melatia Gaɓaɠɔn nui, Yadon Melonɔte nui, ta Gaɓaɠɔn nui tanigaa, é ʋɛɛ Misepa nuiti ba, niiti ziɛ wolai Efelate folo liizu ʋelei tɔna ma ɠundiɠii ti leʋeni. 
Naati poluʋelei ɠa Ɠaalaya ná-doun zunui Uziyɛle, zanu kpɛtɛ nui ɠɛni botii ɠɛɛzu ná, ta gulɔ maku nɛɛnɛ kpɛtɛ nui Ɠanania, ti ta-wotii ɠaaɓelani Zeluzalɛme siɛgi zu ti zeelini la Siɠigi Ɠaawɔɔlɔzu ʋelei. 
Tiya ɓalaa ti ɠobaʋɛ ɠa Lefaya ɠɛni botii ɠɛɛzu ná, Zeluzalɛme taai ɠilazuʋɛ ma ɠundiɠii, Ɠuul ná-doun zunui. 
Naati kobaʋɛ, Ɠalumafe ná-doun zunui Yedaya ɠɛni botii ɠɛɛzu ná-pɛlɛi letemaʋɛ, tɔ ɓalaa kobaʋɛ Ɠasabiniya ná-doun zunui Ɠatuse ɠɛni botii ɠɛɛzu ná. 
Ɠalime ná-doun zunui Malikiya, ta Paɠate-Moaɓe ná-doun zunui Ɠasuɓe ti ɠɛni botii ɠɛɛzu siɠigi gilazuʋɛ ta, ʋɛ Abu Ziɠi Gaaɠoozagi ɠɛni ná zaama. 
Ti ɠobaʋɛ ɠa Aloyese ná-doun zunui Salume ta ná-doun anzanuiti ti ɠɛni botii ɠɛɛzu ná. Salume ɠɛni ga Zeluzalɛme taai ɠilazuʋɛ ma ɠundiɠii. 
Ɠanun ta Zanoa nuiti ka Pɛtugi Ʋɔ Pele Ziɠidaʋɛ loni ʋolu, ti maalɛɛ, ti kpogiti pilɛ da, ta sɔɠɔgiti, naa ʋɛɛ ma wulu zɔkpɔiti ba. Ti mɛtɛlɛ undɔɔlugɔ (500) loni ʋolu siɠigi ʋa, eyɛsu ti zeeli Kpoɠa Siɠidaʋɛ. 
Lekaɓe ná-doun zunui Malikiya, Ɓɛte-Kelɛme ɠoʋi ɠundiɠii ɠa é Kpoɠa Siɠidaʋɛ loni ʋolu, é maalɛɛ, é kpogiti pilɛ da, ta sɔɠɔgiti, naa ʋɛɛ ma wulu zɔkpɔiti ba. 
Kɔle-Wozé ná-doun zunui Salun, Misepa laa ɠundiɠii ɠa Ziɛun Siɠidaʋɛ loni ʋolu, é maalɛɛ, é kpogiti pilɛ da, ta sɔɠɔgiti, naa ʋɛɛ ma wulu zɔkpɔiti ba. Naa ʋoluma é siɠigi loni ʋolu, nii Sela kpoigi ɠobaʋɛ, masagi ná-kpeleiti zɔɠɔzuʋɛ ta nu lɛɛzuʋɛ é yeizu ga Davide ná-taai zu ʋele. 
Tɔun polu munu poun, Azaɓuke ná-doun zunui Neɠemi, Ɓɛte-Suul taai ɠilazuʋɛ ma ɠundiɠii ɠa é ɠɛni botii ɠɛɛzu miná, eyɛsu é zeeli Davide ná-kabamaʋɛ ɠobaʋɛ, é li kpɛtɛai ɓɔɠɔ ʋɛ ɓoigi ʋɔ bɛ, é zei ɠuluɓaiti ta-ʋɛlɛi ʋa. 
Naa ʋoluʋelei Levi nuiti ka ti ɠɛni botii ɠɛɛzu ná: Ɓani ná-doun zunui Lewume, ta Ɠasaɓiya, Keyila taai ɠilazuʋɛ ma ɠundiɠii, naa ɠɛni botii ɠɛɛzu taai lɔɠɔi zu. 
Ti-ɠɛɛlointi ka ti ɠɛni botii ɠɛɛzu ti ʋoluʋelei: Ɠenadade ná-doun zunui Ɓavayi, Keyila taai ɠilazuʋɛ zɔi ma ɠundiɠii, 
ta Zozuwe ná-doun zunui Ezɛɛl, Misepa ɠundiɠii ɠɛni siɠigi ná ta botii ɠɛɛzu kɔɔɠɔ zɔɔlaiti puuzuʋɛ letegi, eyɛsu é li ga zokosu ʋelei. 
Poluʋɛ, Zaɓayi ná-doun zunui Ɓaluke ɠɛni botii ɠɛɛzu ná ga zɛbɛi, é zo siɠigi zokosuʋɛ, é zeeli zalaɠa ɠula ɠundiɠi wolai Eliasiɓe ná-pɛlɛlaʋɛ. 
Naa ʋoluʋelei Ilii ná-doun zunui, Akɔse ná-dounloin Melemɔte ɠɛni botii ɠɛɛzu, é zo Eliasiɓe ná-pɛlɛlaʋɛ, é li kwɛgi ma. 
Tɔun poluʋɛ zalaɠa ɠula nui niiti ti zeɠeni Zeluzalɛme maaɠoolii zu, naati ka ti ɠɛni botii ɠɛɛzu miná. 
Ɓɛnzamɛn ta Ɠasuɓe ti ɠɛni botii ɠɛɛzu ná ta, ta-ʋɛlɛi letegi ma. Maaseya ná-doun zunui, Anania ná-dounloin Azalia ɗa boti ɠɛ ná-pɛlɛ ɠobaʋɛ. 
Tɔ ɓalaa ʋoluʋelei Ɠenadade ná-doun zunui Ɓinuwi ɠɛni siɠigi ná taɠili kpɛtɛzu ʋolu, é zo Azalia ná-pɛlɛi ma, é zeeli siɠigi zokosuʋɛ, ta ma zekii ma. 
Naa ʋoluʋɛ ɠa Uzayi ná-doun zunui Palale ɠɛni botii ɠɛɛzu ná, siɠigi ma zokogiti zɔɠɔzuʋɛ, ta pɛlɛ ɠaaɠoozagi nii é masagi ná-pɛlɛi ɠakalaʋɛ, kaso ziɠigi ɠobaʋɛ. Ná ʋolu munu poun Paleyɔse ná-doun zunui Pedaya 
ta GALA sei ʋɛlɛi wu wotiɠɛ nui niiti ti ɠɛni ɲiizu Wofɛle, naati ti ɠɛni botii ɠɛɛzu eyɛsu é zeeli pɛlɛ ɠaaɠoozagi ma, siɠigi zokosuʋɛ, ʋɛ ná logai folo ɠulazu ʋelei Ziɛ Ziɠidaʋɛ letegi. 
Tekoa nuiti ti ɠɛni botii ɠɛɛzu ná yee ʋoluʋɛ, siɠi gaaɠooza golai é zokogi ɠa, naati zɔɠɔzuʋɛ ta Wofɛle ziɠigi. 
É zo Soo Ziɠidaʋɛ, zalaɠa ɠula nuiti ɛsɛ ge ɠɛni botii ɠɛɛzu siɠigi ná ta, ma nu ná-pɛlɛi letemaʋɛ. 
Naati poluʋɛ lago, Imɛɛl ná-doun zunui Sadɔke ɠɛni botii ɠɛɛzu siɠigi ná ta ná-pɛlɛi letemaʋɛ, naa ʋoluma, Sekania ná-doun zunui Semaya, folo ɠulazu ʋele ziɠidaʋɛ makɛ nui ɠɛni botii ɠɛɛzu. 
Tiya ɓalaa ti ʋoluʋelei, Selemiya ná-doun zunui Ɠanania, ta Salafe ná-doun zunui lɔzitasiɛi Ɠanun, ti ɠɛni siɠigi ná ta ɓɛtɛzu, Ɓelekia ná-doun zunui Mesulame ɗa ná taɠili kpɛtɛ ɲiizuʋɛ letemaʋɛ. 
Ná ɠobaʋɛ, zanu kpɛtɛ nui Malikiya ɠɛni botii ɠɛɛzu ná, eyɛsu é zeeli GALA sei ʋɛlɛi wu wotiɠɛ nuiti ta yaaɠoiti ɲiizuʋɛ, Mifikade ziɠidaʋɛ letemaʋɛ, é zeeli taa makɛ nuiti seizu ʋɛlɛ ɠaaɠoozagi ma, zokogi zu. 
Zanu kpɛtɛ nui zɔiti ta yaaɠoiti, naati ti ɠɛni botii ɠɛɛzu siɠigi ɠaaɓelasuʋɛ, taa makɛ nuiti seizu ʋɛlɛ ɠaaɠoozagi, é zokogi zu ta Baala Siɠidaʋɛ ti yɔɠɔzuʋɛ. 
Sanebalate mɛnigai ma ga Zuifuiti gá ga siɠigi lo ʋolu, ziiɠulani ga gola, é yiiɠaawana. É ɠɛni ɲɛɛɠulazu gi zu, 
é ɠɛni ná-zou zu nuiti ta Samali zalaʋusuiti ma: «Leeni ɠa Zuifuiti ti pɔ ti kɛ, zɛbɛsulala nui tɛiti? Ada ti yɛsu ná, nii ti tɔɔzeiɗai, ti gaaɓela? Ta ɠɛɛzu zalaɠaiti kulazu ná? Niiti ta ta-ʋɛlɛ lo fai nii ɠaaɓelasu za ɓaa? Ti kɔtui naati buzeɠe ʋolu, niiti ti ɠɛa fufiligi wu, ti ɠalaai ga abui?» 
Amɔn nui Toɓiya ɠɛni loni koba, é ɠɛ ma: «Ɓɛ ti to! Wansa ɠila kpe ka lɛɛzu nɔ ta-ziɠigi ʋa, é golo!» 
Gè wooɠulani naazu, gè ɠɛ ma: «Ee, gá-ƓALAGI, woilo dɛ ɲɛɛɠulasui ma ti kɛɛzu ga giye. Ɓaaɠulamai nii ti seizu gi ma, naa la ti unma, toosu nuiti teʋe ti ma, ti ɠɛ ga duɔiti zou ɠili su. 
Mina ta-ɠotoiti suvaayɛ ti ʋɛ, mina ta-vaaɠaaza golaiti gaaʋa, mazɔlɔɔ ti ɓaaɠogɛ gi ma, gɛi gi siɠigi losu ʋolu.» 
Gi siɠigi ná pɛ toni, é zeeli zaamazuʋɛ, mazɔlɔɔ nuɓusɛi kpein ge ɠɛni botii ɠɛɛzu ga yii pɛ. 
