﻿Ɛsedalase.
8.
Pɛlɛyeɠe ɠundiɠiiti daaseigiti kaa, niiti gi lɛɛni ʋɔɔma ga tiye, gi zeɠe Ɓaɓilɔne, gi li Zeluzalɛme, masagi Aaletazɛɛlesɛse ná-siɛgi zu. 
Fineyase mavofodaiti: Gɛɛlɛsome. Itamaal mavofodaiti: Daniyɛle. Davide mavofodaiti: Ɠatuse. 
Sekania ta Paleyɔse ti-mavofodaiti: Zakali, nii é ɠɛni nu ungila nu ʋuulɔɔlu (150) unda. 
Paɠate-Moaɓe mavofodaiti: Eliyɔyenayi, Zelayia ná-doun zunui, nii é ɠɛni nu unfelegɔ (200) unda. 
Zatu mavofodaiti: Sekania, Yaɠaziyɛle ná-doun zunui, nii é ɠɛni nu unsaʋagɔ (300) unda. 
Adin mavofodaiti: Eɓɛde, Zonatan ná-doun zunui, nii é ɠɛni nu ʋuulɔɔlugɔ (50) unda. 
Elame mavofodaiti: Ezayi, Atalia ná-doun zunui, nii é ɠɛni nu ʋuulɔfela (70) unda. 
Sefatia mavofodaiti: Zeɓadia, Mikayɛle ná-doun zunui, nii é ɠɛni nu ʋuulɔsaʋa (80) unda. 
Zoaɓe mavofodaiti: Aɓediyase, Yeɠiyɛle ná-doun zunui, nii é ɠɛni nu unfelegɔ nu puugɔ maazu lɔsaʋa (218) unda. 
Selomite mavofodaiti: Yosifiya ná-doun zunui, nii é ɠɛni nu ungila nu ʋuulɔzita (160) unda. 
Ɓeɓayi mavofodaiti: Zakali, Ɓeɓayi ná-doun zunui, nii é ɠɛni nu ʋuufelegɔ maazu lɔsaʋa (28) unda. 
Azagade mavofodaiti: Yoɠanan, Ɠakatan ná-doun zunui, nii é ɠɛni nu ungila nu puugɔ (110) unda. 
Adonikame mavofodaiti: gaaɓelagiti niiti ti-laaseigiti ti ɠɛni ga Elifelɛte, Yeiyɛle, ta Semaya, naati ti ɠɛni nu ʋuulɔzita (60) unda. 
Ɓigivayi mavofodaiti: Utayi ta Zakuul, niiti ti ɠɛni nu ʋuulɔfela (70) unda. 
Gè niima nuiti kpein gaalɛɛni ba ziɛ wolai ɠobaʋɛ, nii é yeizu ga Aɠava ʋele, gi yɛni miná folo saʋagɔ laawu. Gè wɛlɛni nuɓusɛiti saama ta zalaɠa ɠula nuiti, gè la Levi nu nɔpɛ kaani ti zu. 
Názu ɠa gè kundiɠii niiti tolini la: Eliyezɛɛl, Aliyɛle, Semaya, Ɛlɛnatan, Yaliɓe, Natan, Zakali, ta Mesulame, naa ʋɛɛ tɔ kalamɔn felegɔiti ba Yoyaliɓe ta Ɛlɛnatan. 
Gè valini ti ma ga ti li Kasifia ɠundiɠii Ido ʋɔ bɛ, gè wooi ʋu ti-la, nii ta bo Ido ma, ta kɛɛɠɛlointi pɛ, GALA sei ʋɛlɛi wu wotiɠɛ nuiti niiti ti Kasifia, ga ti kpɔba nuiti teʋe gi ma, gá-ƓALAGI zei ʋɛlɛi vai zu. 
Tɛi gá-ƓALAGI ma ge ɠɛni gi ʋa, é ɗa gi ɠaazumaawɔinɠa, ti Seleɓia leʋeni gi ma, nu ɠɛni de ɠigi ma, Maali ná-bolodai zu, Levi mavofodai zu, Izilayɛle ná-doun zunui, ti nu puugɔ maazu lɔsaʋa (18) ʋɛɛni ba kɛɛɠɛlointi saama, ta ná-doun zunuiti, 
é ʋɛɛ Ɠasaɓiya ta Ezayi ʋa, ti ɠɛ Melali mavofodaiti, ta kɛɛɠɛlointi, é ʋɛɛ ti-loun zunuiti ba, ti pɛ kpɔga ɠɛni ga nu ʋuufelegɔ (20). 
Ti ʋaani ɓalaa ga nu unfelegɔ nu ʋuufelegɔ (220), niiti Davide ta pɛlɛyeɠe ɠundiɠiiti ti yeeloni ti pɛ ba ga ti-laaseigiti, ti ti ve Levi nuiti zea, ga ti ɗa botii ɠɛ GALA sei ʋɛlɛi wu. 
Gi yɛni miná ziɛ wolai ɠobaʋɛ, nii é yeizu ga Aɠava ʋele, gè deve ga gi zugi zo, naa ɠɛ ga gá-ɓɔɠɔmaayeii ma ʋoogi gá-ƓALAGI ʋɛ, nii a kɛ gi siɛ ʋagɔ wo ziilɛigi zu, gá gá-ʋɛlɛyeɠeiti, ta gi-ɠɔligiti. 
Nà la ɠɛɛna masagi ma, é salaʋusuiti ta soo ɓizɛ zalaʋusuiti fe, ti gi makɛ gi zili nuiti daalɔɠɔma, naa ɠɛni ɠɛɛzu ga unfe faa zèa, tɔɔzei gi dɛɛni la ga, gá-ƓALAGI ɠa ɗa naati makɛ, niiti ti bɛ ga wooɠɛɠila nuiti, kɛlɛ toɠa ɗa yiiɠaawana gola naati ma, ti ɠɛlɛzu tɔun ba. 
Naa maaʋele ma, gi zugi zoni, gi gá-ƓALAGI maanɛɛnɛni ga é ɓaa gi maazu, tama é gi wooɠaaʋoteni. 
Naa ʋoluma gè zalaɠa ɠula ɠundiɠi puugɔ maazu felegɔ (12) lolini, ta Seleɓia, naa ʋɛɛ Ɠasaɓiya ʋa, ta ti-ɠɛɛloun puugɔ. 
Gè walii ta zanugi ɠɔɠɔni, gè pɛɛ sɔɔla ɓiigiti kpein ba niiti masagi ta ná-tɛnɛbo nuiti, naa ʋɛɛ ná-botiɠɛ nu wolaiti ba, ta Izilayɛle nuiti ti ná-zooi zu, ti kpɔni ba gá-ƓALAGI zei ʋɛlɛi vai zu, gè fe ti ya. 
Gè kilo waaʋuufelegɔ (20.000) veeni ti ya ga walii, gè kilo waasaʋagɔ (3.000) ve ti ya ga ani ɓiigiti ti ɓɛtɛai ga walii, gè kilo waasaʋagɔ (3.000) ve ti ya ga zanugi, 
gè zanu ɗaawɔ ʋuufelegɔ (20) ve ti ya, nii a la zeeli zanu kae waagila (1.000) su, ta kɔlu ɓɔi aniɲaka ʋapa felegɔ, ti ʋagai ga zanugi ɠɛʋele. 
Gè ɠɛni ti ma: «Ʋelei wo veai la Ɠɔoɠɔ GALAGI ʋɛ, ʋele ɠana niima zɔɔlaiti feai la. Walii ta zanugi ta ga vebɛaniiti, niiti ti ve Ɠɔoɠɔ GALAGI ʋɛ, wo-mɛmɛwolani ta-ƓALAGI. 
À ɓaa ti maazu ga pagɔ, eyɛsu wo zeeli Zeluzalɛme, názu wa ti pɛ gaalu niina, wo ti ve zalaɠa ɠula ɠundiɠi wolaiti zea, ta Levi nuiti, é ʋɛɛ pɛlɛyeɠe ɠundiɠiiti ba, wo ti ʋu Ɠɔoɠɔ GALAGI zei ʋɛlɛi ma ʋɛɛbagoiti bu.» 
Zalaɠa ɠula nuiti ta Levi nuiti ti walii ta zanugiti seɠeni, é ʋɛɛ sɔɔlai zɔiti ba, ti li ga tiye Zeluzalɛme, gá-ƓALAGI zei ʋɛlɛi wu. 
Alu mɔungi ma volo puugɔ maazu felegɔi (12) ma, gi zeɠeni ziɛ wolai ɠobaʋɛ, nii é yeizu ga Aɠava ʋele, gi li Zeluzalɛme. Eyɛsu gi zeeli, gá-ƓALAGI yeeyɛni gi ʋa, é ɗa ɓaa gi maazu gi zili nuiti ta toosu nuiti daalɔɠɔma, niiti ti ɠɛni gi maaluazu. 
Gi zeeliai ma Zeluzalɛme, gi looɠoni folo saʋagɔ laawu. 
Foloi naanisiɛi, gi walii, ta zanugi, ta sɔɔla ɓiigiti gaaluni gá-ƓALAGI zei ʋɛlɛi wu, gi ti ve zalaɠa ɠula nui Melemɔte ya, Ilii ná-doun zunui, ta Fineyase ná-doun zunui Eleazaal. Levi nui niiti ti ɠɛni ti ɠoba, ti-laaseigiti kaa: Zozuwe ná-doun zunui Yozaɓade, ta Ɓinuwi ná-doun zunui Noadia. 
Ti gaaluni, é ɠɔɠɔ, buɲɛgi ɓɔgai pɛ ge zɛʋɛni sɛʋɛi zu. 
Niiti kpein ti duɔlai ɠɛɛni, ti ɠale ma, naati ti zalaɠaiti kulani Izilayɛle ná-GALAGI ʋɛ ga: nikɛ zinɛ puugɔ maazu felegɔ (12), Izilayɛle nuiti kpein bɛ. Ti baala sinɛ ʋuutaaʋuugɔ maazu lɔzita (96), ta baala ziʋo ʋuulɔfela maazu lɔfela (77) ɠulani gala zalaɠaiti faa zu, ta boli zinɛ puugɔ maazu felegɔ (12) ga koto gba zalaɠai. Togani naati kpein ti ɠalani Ɠɔoɠɔ GALAGI ʋɛ. 
Naa ʋoluma ti masagi ná-sɛʋɛi zu wooi laazeelini ná-nu wolaiti ma, ta zou zɛʋɛ ɠundiɠiiti ma, ti zeini ziɛ wolai Efelate folo liizu ʋelei. Naati ti tɔnɔ ma ɓɔbai ɠɛɛni Izilayɛle nuiti bɛ, GALA sei ʋɛlɛi lo fai zu. 
